الغمة هتنزاح.. الحكومة تكشف لأول مرة موعد نهاية أزمة الكهربا فى مصر

هي أزمة الكهربا فى مصر ممكن تخلص امتى ؟ وايه الاجراءات اللى هتعملها الحكومة لحل واحد من أخطر الأزمات اللى بتواجهها مصر؟ وهل البنك المركزي هيقدر يوفر احتياجات الحكومة لاستيراد كميات  الغاز والمازوت المطلوبة ؟

من ساعات ولأول مرة الحكومة أعلنت عن جدول زمنى واضح لحل أزمة انقطاع الكهرباء فى مصر بعد زيادة عدد ساعات تخفيف الأحمال وشكاوى المواطنين فى مختلف المحافظات من قطع التيار.

رئيس الحكومة مصطفى مدبولى طلع بنفسه واتكلم عن اسباب الأزمة والحكومة هتعمل ايه عشان تنهي أزمة قطع التيار .. وأكد  أن سبب أزمة انقطاع الكهرباء امبارح هو خروج أحد الحقول فى دول الجوار عن الخدمة نتيجة حدوث عطل وتوقفها عن العمل أكتر من 12 ساعة وهو ما أدى لزيادة فترة انقطاع الكهرباء.

مدبولى قال ان  شهر يونيو الجاري حصل فيه 3 موجات حارة غير مسبوقة، وهي مستمرة لغاية دلوقتي  ومنها الموجة اللي تم تسجيلها خلال إجازة عيد الأضحى، وقال كنا حريصين على عدم زيادة تخفيف الأحمال عن ساعتين فقط يوميا.

وقال رئيس الحكومة  انه وجه وزير المالية الدكتور محمد معيط بتدبير مبلغ مليار دولار لتوفير كافة احتياجات وزارتي الكهرباء والبترول من المازوت والوقود حتى نهاية فترة الصيف. 

وأعلن   استمرار تخفيف الأحمال الكهربائية لـ 3 ساعات لغاية الاسبوع التالت من شهر يوليو المقبل، بعد التعاقد على استيراد ما تحتاجه وزارة الكهرباء والبترول من الوقود والمازوت واللي هتصل مطلع الأسبوع المقبل بعد أن تم تدبير الاعتمادات الدولارية اللازمة.

وكشف الدكتور مدبولي،  إنه تقرر فى ضوء جهود ترشيد الكهرباء، غلق المحلات التجارية 10 مساء باستثناء السوبر ماركت 1 صباحاً اعتبارا من الأسبوع المقبل

وجدد رئيس الحكومة اعتذاره للشعب عن موضوع قطع الكهرباء، وقال ،" بيجيلى رسائل من شكاوى قطع الكهرباء ومدى معاناة المواطنين والأسر المصرية".

واختتم تصريحاته بإنه هيتم إنهاء أزمة الكهرباء بالكامل بنهاية العام الجارى وقال انه مفيش  أزمة توليد طاقة ولا نقل ولكنها أزمة تدبير الوقود .