هي الحكومة الجديدة فين.. هنقولك على سر تأخر التشكيل

هو ليه الدكتور مدبولي مقدمش الحكومة الجديدة للرئيس لغاية دلوقتي وإيه السر اللي خلاه يصبر شوية وايه اخر معاد هيقدم فيه التشكيل الوزراي الجديد.. تعالو نشوف التفاصيل

النهاردة 21 يوم بالتمام والكمال علىى تقديم الدكتور مصطفي مدبولي لاستقالة حكومته للرئيس السيسي وإعادة تكليف الرئيس ليه بتشكيل الحكومة الجديدة ولغاية دلوقتي لا حس ولا خبر ولا حتى ترشيحات قوية بتتسرب زي ماكان بيحصل في تشكيل الحكومات السابقة ياترى ايه السر؟
الحكاية تقدر تقول مفهاش سر ولاحاجة لكن فيه اسباب خلت مدبولي يتأخر في تقديم وزارته الجديدة أولها إنه لازم ياخد وقته في اختيار الوزراء الجدد وخاصة إن التحديات والأزمات كتيرة قدام الحكومة الجديدة وإن تكليف الرئيس لمدبولي فيه توجيه باختيار كفاءات تقدر تصنع الفارق وأكيد الدكتور مدبولي بيقابل كل يوم أكتر من شخصية مرشحة لكل وزارة يعني هيقابل عشرات الشخصيات عشان يعرف منهم طريقة تفكيرهم ومدى قدرتهم على تحمل المسئولية وبعدين يختار منهم الوزرا اللي هيشكلو معاه الحكومة ودي أكيد هياخد وقت عشان يختار الاصلح فيما بينهم.
طيب فيه اسباب تانية؟
أكيد فيه والمنطق بيقول إن البلد دلوقتي في أزمة بسبب الحر الشديد وتخفيف الاحمال ومشكلة الوقود والحكومة بتسابق الزمن عشان تحلها فطبيعي مايحصلش أي تغيرات دلوقتي عشان مايحصلش اي ارتباك في خطط الدولة وعشان كمان الوزرا الجداد يستلمو وزاراتهم الجديدة بعد الازمات ماتهدى لأن الاولوية دلوقتي للمواطن والتخفيف عنه واكيد الازمات دي واخدة وقت كبير من الدكتور مصطفي مدبولي على حساب جهود تشكيل الحكومة الجديدة لأن فيه أولويات فرضتها الأوضاع الطارئة من ارتفاع درجة الحرارة الغير مسبوقة وكمان مع أزمة الحجاج المصريين اللي اتوفوا في السعودية واللي مدبولي واخدها على صدره وبيحقق فيها بنفسه وخد اجراءات ضد الشركات اللي طلعتهم من غير تصريح حج.
طيب الحكومة الجديدة هتعلن امتي؟
المنطق بيقول إنها خلال ايام وتحديدا قبل احتفالات 30 يونيو اللي جاية لأن التاريخ ده بيمثل فارق زمني بين مرحلة والتانية ودي فرصة الحكومة الجديدة تبدأ عملها في مناسبة وطنية مهمة زي ذكرة ثورة 30 يونيو وده المعاد المرجح لإعلان تشكيل الحكومة الجديدة  ودا اللي بيرجحه العقل.
الخلاصة الحكومة الجديدة وحسب المعلومات اللي حصلت عليها بانكير حصريا هيكون فيها أسماء قوية جدا خاصة في الحقائب الوزراية ووجوه مقبوله جماهيريا وليها صيت دولي كمان وإنها هتصنع فارق كبير في الملف الاقتصادي والمالي وهتتبني اصلاحات كبيرة.