قبل ماتستثمر فلوسك خلي بالك من اللي ممكن يحصلك

كتير مننا بيفكر أو فكر فعلا في استثمار فلوسه لو معاه فلوس زيادة عشان يزود دخله.. قبل ماتقرر تشتغل في ايه شوف الفيديو ده للأخر عشان هيعرفك إزاي تحمي فلوسك وتشغلها صح.. تابعونا للأخر

افضل وسيلة لحماية الفلوس دلوقتي إنك تشيلها من تحت البلاطة وتشغلها في استثمار ناجح ومضمون ولو مش معاك فلوس فنصيحة تتصرف وتوفرها عشان بردو تشغلها في حاجة تجيبلك دخل يومي أو شهري يساعدك في مواجهة الغلاء وظروف المعيشة الصعبة لأن تخزين الفلوس دلوقتي بعيد عن البنوك او الاستثمار معناها إن فلوسك بتنزف وقيمتها بتقل كل شوية.
طيب لو مش معاك فلوس اصلا تشغلها واللي جاي على قد اللي رايح تعمل ايه؟
شوف قدامك اكتر من طريقة أولها انك ممكن تبيع أصول عندك زي حتة ارض وارثها مثلا أو بيت زيادة أو حتى منقولات انت مش محتاجها ولو وقفت خالص قدامك البنوك بتدي قروض كتير وتقدر تاخد منها تمويل وتبدأ بيه مرحلة تانية من حياتك.
طيب لو الفلوس اتوفرت من اي حتة تشغلها إزاي؟
شوف قبل ماتشتغل في اي حاجة لازم تكون فاهمها كويس جدا وعامل حساب المخاطر والخساير قبل المكسب وماينفعش تحط فلوسك في حاجة انت مش فاهمها ولا عمرك اشتغلتها لانك هتخسر أكيد وفي الحالة دي ممكن تستعين أو تشارك حد يكون فاهم في النشاط اللي هتشتغل فيه.
كمان قدامك انواع من الاستثمار مضمونة ومش محتاجة خبرة كبيرة زي مثلا الاستثمار في الدهب واللي اغلب المصريين بقوا فاهمين فيه وكل اللي عليك انك تشتري بالفلوس اللي معاك في وقت سعر الدهب فيه رخيص وتبيع بعد فترة لما سعره يبقي غالي كمان تقدر تشتري عقار وتأجره منها بتاخد ايراد شهري ومن الناحية التانية قيمة العقار نفسه بتزيد وفي نفس الوقت ممكن تبيع الاصول اللي عندك واللي مش بتجيب عايد زي ماقلنا وتشتري بيها كلها شهادات ادخار وتاخد عليها فوايد عالية ودي استثمار مناسب جدا للموظفين او الناس اللي معندهاش وقت عشان تتابع المشروعات أو تباشر الاشراف.
من المحاذير التانية وانت بتستثمر إنك متسلمش حد فلوسك غير بالضمانات الكافية وتاخد قصادها ورق ومستندات  وكمان ماينفعش تصرف كل المبلغ اللي معاك على المشروع كله ولازم تسيب جزء للطواريء لو حصل اي حاجة في المشروع وأخر حاجة لازم تشوف السوق محتاج ايه يعني متروحش تشتغل في حاجة الناس مش محتجاها وإلا هتخسر فلوسك.