لغز حكومة مدبولي وسر تأخر إعلان التشكيل.. هنقولك الحكاية ومافيها
ليه الدكتور مدبولي اتأخر في اعلان التشكيل الوزاري لغاية دلوقتي وإيه السر اللي مخبيه على الاعلام وسر غضبه من التسريبات اللي بتطلع اليومين دول عن الحكومة الجديدة.. خليكم معانا للأخر وهنشوف التفاصيل
زي ما احنا عارفين الاسبوع اللي فات الرئيس السيسي قبل استقالة الحكومة واعاد تكليف الدكتور مصطفي مدبولي بتشكيل الحكومة الجديدة ولغاية دلوقتي مفيش حس ولا خبر وكل اللي بيطلع اجتهادات شخصية عن اسماء وزراء مرشحين ولما الكلام كتر والتسريبات زادت لدرجة فيه توقعات كتبت اسماء الوزراء الجدد كلها طلع مصدر رسمي ونفي أي صحة للتسريبات اللي بتطلع وناشد وسائل الاعلام والسوشيال ميديا بانتظار نتائج التشكيل الوزاري الرسمي ونفى المصدر كل الكلام اللي بيتقال عن دمج وزرات والغاء وزرات تانية وقال إن كل دا اجتهاد ملهوش أساس من الصحة.
طيب نرجع لسؤالنا ليه مدبولي اتأخر في اعلان التشكيل؟
شوف حضرتك رغم إن الدكتور مدبولي ليه سنين في الحكومة اللي فاتت واتعامل مع كل المسولين في الدولة من الصف التاني في الوزارات والجامعات ومراكز صنع القرار وأكيد ليه دراية كبيرة بأسماء ليها تقل في الاقتصاد والادارة يعني مفيش مبرر لللوقت ده كله لأنه زي ما بنقول هو في الملعب وعارف مين ممكن يعمل إيه لكن يظهر إن الدكتور مدبولي بيدرس ويختار على مهله اسم كل وزير وخاصة وزراء المجموعة الاقتصادية لأن المرحلة الجاية عايزة وزراء من طراز خاص وناس فاهمة وتقدر تاخد قرار وتتعامل مع أي ازمات ويكون عندها حلول وقتية.
وحسب المعلومات اللي حصل عليها بانكير من مصادره الخاصة الدكتور مدبولي بيفاضل بين أسماء كتير مرشحة لنفس الوزارة وتحديدا الوزارات الاقتصادية زي ماقلنا وفيه اسماء كتير قدامه وقعد مع أغلبها واتكلم معاهم لكن لسه مخدش قرار حاسم وفي النهاية الراجل عاوز حكومة تشيل معاه ومتبقاش هي مصدر أزمات زي ماحصل كده في وزارة التموين واللي دخلت خناقة مع الناس اللي مش مقتنعة باسلوب الدكتور على مصيلحي وادارته لأزمات اراتفاع الاسعار وده غير الفساد اللي الاجهزة الرقابية مسكته في الوزارة ومنهم مستشار الوزير شخصيا .
القصد مدبولي بيدور على ابرة في كوم قش في كل وزارة وده سبب تأخير اعلان الوزارة الجديدة واللي مقرر يعلنها على اخر الاسبوع دا وقبل العيد طبعا عشان تبدأ تشتغل على طول والناس كمان مستنية تشوف الوزار الجداد هيعملوا ايه في الغلاء وظروف المعيشة الصعبة.
