إلحق نفسك قبل الذروة.. اشتري دهب دلوقتي ومتقولش ليه

 
إيه اللي هيحصل في سوق الدهب الأيام الجاية وليه دلوقتي الوقت المناسب عشان تستثمر في فلوسك وايه حيلة التجار لرفع السعر.. حضر فلوسك وشوف الفيديو الأول للآخر .

 
الدهب رايح في حتة تانية الأيام الجاية ده اللي اتفق عليه خبراء الصاغة وكمان اتفقوا إن الوقت الحالي هو الأنسب للشراء والاستثمار لأن الأسعار بدأت تاخد اتجاه تصاعدي لأسباب كتير أولها اقتراب موسم الأعياد وكمان موسم عودة المصريين من الخارج في الإجازات الصيفية وانتهاء مبادرة دخول الدهب من غير جمارك وكمان فيه حاجة تانية كشفتها تعاملات السوق خلال الأيام اللي فاتت وهي لجوء تجار الدهب لتصديره للأسواق الخارجية عشان تتغلب على ضعف الطلب في الأيام الأخيرة وده سبب مهم من أسباب زيادة أسعار المعدن الأصفر ومع مكاسب التجار من التصدير واللي هو بيكون بالدولار متوقع استمرار حيلة التجار لرفع الأسعار.
كل العوامل اللي قلنا عليها دي محليا هتكون سبب إن الدهب هيوصل لارقام فلكية في الأيام الجاية وضيف عليهم كمان أسباب عالمية كتير زي حالة الهجوم على المعدن النفيس من البنوك المركزية واللي حققت ارقام قياسية في عمليات الشراء مقابل نقص المعروض العالمي وده ساهم في زيادة الأسعار بشكل كبير في السوق العالمي.. كمان متوقع استمرار ارتفاع أسعار الدهب عالميا بسبب نية بنك الاحتياطي الفيدرالي الأمريكي لخفض سعر الفايدة وقرارات بنوك مركزية أوربية خفض سعر الفايدة بالفعل واتجاه البنك الأوروبي لخفض أسعار الفايدة هو كمان.
طيب ايه علاقة أسعار الفايدة على الدولار بسعر الدهب ؟
اكيد طبعا فيه علاقة مباشرة لأن خفض سعر الفايدة على العملة الأمريكية وهي عملة عالمية هيقفز بأسعار المعدن الأصفر لأن بينهم علاقة عكسية ولأن الطلب بيزيد اكتر على شراء الدهب وقتها لأن البنوك المركزية العالمية بتحاول تعوض خسارة احتياطياتها من النقد الأجنبي واللي أغلبه بالدولار وتشتري دهب لانه عنصر أساسي من عناصر الاحتياطيات النقدية في البنوك المركزية.
طيب تعمل أيه عشان تستثمر صح في الدهب ؟
زي ما قلنا ده الوقت المناسب عشان تشتري وتستثمر وتحفظ قيمة فلوسك وفي نفس الوقت تضمن قيمتها تزيد مع الايام والافضل ليك تشتري سبايك أو جنيهات دهب لأنها اكتر الأنواع اللي بتحفظ بقيمتها على عكس المشغولات الذهبية واللي بتتعامل على أنها دهب مستعمل لما تيجي تبيع والافضل كمان انك تحتفظ بالكعب لأكبر فترة ممكنة على الأقل من 3 إلى 5 سنين عشان تكسب كويس.