الأيام الأخيرة للدولار.. 3 أخبار سارة تنهي أزمة العملة الصعبة في مصر
يا ترى ازمة نقص العملة الأجنبية فى مصر انتهت بلا رجعة ولا ممكن السوق السودا تعمل ريمونتادا وترجع من تاني؟ وايه ال 3 أخبار السعيدة اللى بتقول ان مصر ماشية فى الطريق الصحيح؟ وليه الاحتياطي النقدي من الدولار رجع يزيد من جديد؟
بعد أكتر من سنتين على أزمة نقص العملة اللى عانت منها مصر من بعد الحرب الروسية الاوكرانية ولحد دلوقتى نجحت الاجراءات اللى خدتها الحكومة في تحسن كبير في السيولة الدولارية. وارتفع احتياطي النقد الأجنبي لمصر إلى 46.125 مليار دولار مقابل 41.057 مليار دولار بنهاية أبريل 2024 وفق أحدث بيانات للبنك المركزي .
واللى حصل ده ساهم فى عودة الهدوء الى سوق الصرف فى مصر بعد فترة طويلة من الانفلات خلت سعر الدولار يوصل لأكتر من 70 جنيه فى السوق السودا قبل ما يتدخل البنك المركزي بقرارات تاريخية يوم 6 مارس اللى فات ويحرر سعر صرف الجنيه وكمان يرفع الفايدة 600 نقطة اساس مرة واحدة
وخلال آخر 3 شهور استقبلت مصر حوالي 50 مليار دولار استثمارات وتدفقات دولارية بفضل إجراءات البنك المركزي اللى ساهمت فى توحيد سعر الصرف وتهيئة المناخ لجذب تدفقات الاستثمار الأجنبى المباشر وغير المباشر
على الرغم من التحسن الكبير في السيولة الدولارية خصوصا بعد إتمام تعديل اتفاق التمويل مع صندوق النقد الدولي، وإعلان صفقة رأس الحكمة الا ان عدد من المسؤولين المصريين بيتواجدوا حاليا في لندن لقياس مدى شهية الأجانب تجاه إصدارات الديون الجديدة، بما فيها إصدارات السندات الدولارية الدولية.
وليه لحد دلوقتى الحكومة ما قررتش إذا كانت هتصدر ديون في الأسواق الدولية خلال العام المالي 2025/2024 ولا ممكن تستنى شوية .
ووفقا لتصريحات أخيرة لوزير المالية محمد معيط هيتم تحديد حجم الاحتياجات التمويلية من الأسواق الدولية بعد إقرار الموازنة 2024/2025 وكشف انه لحد دلوقتى مفيش خطة لطرح سندات في الأسواق الدولية وننتظر اعتماد الموازنة لتحديد الاحتياجات
وخلال 2023 جمعت الحكومة 1.5 مليار دولار من إصدارها الأول من الصكوك السيادية، كما جمعت ما يعادل 980 مليون دولار من السندات المقومة باليوان الصيني والين الياباني.
وفي ديسمبر اللى فات أعلن وزير المالية إن الحكومة ناقشت مع مسؤولين بدول الخليج مدى إمكانية طرح سندات مقومة بالعملات الخليجية، على غرار السندات اللي طرحتها مصر في السوقين الصيني والياباني (الباندا والساموراي).
طب هل كده أزمة الدولار فى مصر انتهت بلا رجعة ؟
الدولة شغالة على خطة كبيرة جدا للتخلص من أزمة نقص العملات الأجنبية بلا رجعة وده عشان تمنع عودة السوق السودا للدولار من جديد ووجود أكتر من سعر للعملة الأمريكية لخطورة ده وتأثيره على مناخ الاستثمار وعلى جذب استثمارات أجنبية جديدة
ولحد دلوقتى تحركات الحكومة ناجحة والدولار بيتوفر بكميات معقولة وده اللى خلا سعر العملة الاريكية يتراجع فى البنوك وشركات الصرافة الايام اللى فاتت
ومؤخرا أعلن محمد الاتربي رئيس اتحاد بنوك مصر ، إن الجهاز المصرفي المصري حاليا يشهد تطورات مهمة زادت من قوته
الاتربي أعلن كمان إن السوق الموازية للنقد الأجنبي في مصر انتهت وقال ان تحويلات المصريين في الخارج عبر الجهاز المصرفي ارتفعت بشكل ملحوظ وان عمليات التنازل عن الدولار فى ازدياد بشكل يومي وان حصيلة النقد الأجنبي للبنوك زادت عشرات الأضعاف ما يؤكد نجاح سياسة الحكومة والبنك المركزي.
