الجمعة 14 يونيو 2024
رئيس التحرير
عمرو عامر
المشرف العام
عبدالعظيم حشيش
اقتصاد مصر

سر هجوم الشركات المصرية على الاسواق السعودية.. خطة استيراد الدولار

الأربعاء 05/يونيو/2024 - 01:40 ص
الدولار
الدولار




ياترى ليه الشركات المصرية الكبيرة غزت السوق السعودي وخاصة في مجال العقارات وإيه مردود ده على مصر وإيه الأرقام الضخمة اللي كشفت عنها السلطات السعودية في الساعات الأخيرة وإيه حكاية استيراد الدولار من الخارج.. تفاصيل كتيرة هنشوفها في الفيديو ده

النهاردة الجهات المعنية في السعودية أعلنت عن احصائيات اقتصادية مهمة عندها وكان محورها تنامي الاستثمار المصري في الكبير هناك.. أيوا زي حضرتك ما سمعت كده الشركات المصرية بقت حديث الخليج والسعودية تحديدا بسبب حجم الأعمال الضخمة اللي استحوذت عليها في السوق السعودي تحديدا والبيانات السعودية الرسمية قالت إن
الشركات المصرية استحوذت على 30% من إجمالي عدد التراخيص الاستثمارية اللي أصدرتها وزارة الاستثمار السعودية خلال أول 3 شهور في 2024، باجمالي 950 ترخيص من أصل 3157 ترخيصاً.
ولسه مكملين معاكم في البيانات السعودية عشان نعرف الحكاية بالتفصيل واللي قالت إن الشركات المصرية ركزت أكتر على الاستثمار في قطاع العقارات السعودي وبعدها جت القطاعات المهنية والتعليمية والزراعة وصيد الأسماك بـ129%.
طيب ليه الشركات المصرية بتستثمر في البلاد الخارجية ومش مركزة استثماراتها في مصر؟
شوف حضرتك الاستثمارات الخارجية مهمة جدا للشركات المصرية ولأي شر كة في أي دولة لأنها بتدي نفسها فرصة تتوسع وتنوع نشاطها وتعدد مكاسبها كمان والشركات المصرية وخاصة شركات المقاولات والانشاءات والتطوير العقاري ثبتت وجودها عالميا خاصة في افريقيا وعملت مشروعات ضخمة جدا منها شركة المقاولين العرب والسويدي واللي عملوا مشروع سد عملاق في تنزانيا باستمثارت وصلت تقريبا 3 مليار دولار.

طيب الشركات المصرية هتستفاد ايه من الاستثمارات الخارجية
أكيد ده بيدي فرصة للشركات تزود ملائتها المالية من الدولار والتوسع أكتر وخلينا نأكد إن الشركات المصرية مش هتقدر تنافس بره غير لو هي كبيرة ومتواجدة في السوق المصري لكن بتطلع تتوسع أكتر للأسباب اللي قلنا عليها وفي النهاية المصلحة بتصب في صالح الشركة وفي صالح مصر لأن الشركات مش هيكون عندها مشاكل مالية في المشروعات اللي في مصر.
لو عاوز تعرف الشركات المصرية بتعمل ايه في السعودية كفاية تعرف إن مجموعة هشام طلعت مصطفي بتنفذ دلوقتي مشروع عقاري فاخر عالمي هناك باستمثارت 65 مليار ريال أو مايعادل 17.5 مليار دولار.
طيب ايه علاقة استثمارات الشركات المصرية بره بالدولار في مصر؟
تقدر تقول كده ان الشركات دي عملت استثمار عكسي في اسواق خارجية عشان تكسب بالدولار لأنها بتحاسب على مشروعاتها بالعملة الامريكية وفي النهاية جزء كبير من الدولارات دي بيروح لحسابات الشركة الأم في مصر وعلى فكرة فيه شركات كتيرة منها ملكية حكومية أو الحكومة ليها نسبة فيها زي المقاولين العرب وحسن علام وغيرها من الشركات الكبيرة يعني الدولة في الأخر هتستفاد كمان لما الشركات يكون عندها سيولة كبيرة تقدر تتوسع في مشروعاتها في مصر لان مهما كانت المكاسب في الاسواق الخارجية هيفضل السوق المصري هو الأكبر في مجال العقار تحديدا ومصر بتعيش طفرة في قصة تصدير العقار الفاخر وفي مشرعات عالمية بتم دلوقتي في المدن الذكية الجديدة زي العلمين ورأس الحكمة وعلى طول الساحل الشمالي وفي النهاية كله هيصب في مصلحة البلد.