الجمعة 14 يونيو 2024
رئيس التحرير
عمرو عامر
المشرف العام
عبدالعظيم حشيش
اقتصاد مصر

إيه اللي هيحصل بعد زيادة سعر رغيف العيش.. الدعم رايح فين

الخميس 30/مايو/2024 - 04:01 ص
رغيف الخبز
رغيف الخبز

 


إيه اللي هيحصل بعد ما الحكومة رفعت سعر رغيف العيش وإزاي الحكومة هتقنع الناس إن القرار لمصلحتها وإيه مصير باقي الدعم وهل زيادة العيش دي الاخيرة ولا لسه فيه صدمات تانية.. تعالو نشوف الحكاية

النهاردة زي ما تابعنا رئيس الحكومة الدكتور مصطفي مدبولي طلع وقال كلام كتير لكن كان أهم اللي قاله واللي يهم الناس قصة الدعم ورفع سعر رغيف العيش المدعم من 5 قروش الي  20 قرش وغير الكلام عم طرح فكرة استبدال الدعم العيني بدعم نقدي للحوار الوطني..
طبعا الكلام كان صادم للناس لان المصريين عندهم رغيف العيش خط أحمر ومش المشكلة في زيادته من 15 قرش مرة واحدة لكن الناس دايمة بتخاف أكتر من اللي بيحصل بعد القرار وحالة الاستغلال اللي بتكون في الاسواق وازاي لما  حاجة سعرها بتزيد حتى لو بقرار رسمي تجار سلع ملهاش علاقة بالقرار بترفع الأسعار يعني مثلا ممكن بكرة تلاقي افران الفينو والعيش السياحي أو الحر رفعوا الاسعار رغم إن القرار مش خاص بيهم وصادر تحديدا للعيش المدعم واللي الدولة حركت سعره بعد 30 سنة ثبات عشان تحسن منظومة الدعم نفسها وتقلل التكلفة الكبيرة جدا للرغيف واللي بيكلف الدولة جنيه وربع تقريبا وهدف القرار تقليل الفجوة بين التكلفة والبيع وبالتالي تقليل الضغط على الموازنة.

رفع سعر رغيف العيش نهاردة جاي بعد ساعات من تأكيد الحكومة إن الدعم مستمر على الرغيف وإنه زيادة السعر هتكون بالتدريج ومش هتأثر على المواطن ومش هيتم رفعه مرة واحدة.. طيب ايه اللي المفروض يحصل دلوقتي بعد القرار.. الموضوع محتاج فعلا وقفة مع أي تاجر أو صاحب فرن هيستغل القرار في التلاعب في الأسعار أو الوزن أو الحجم للرغيف وفي نفس الوقت مطلوب من الحكومة شوية رقابة على الأسواق وإن  المواطن مايبقاش فريسة لباقي التجار اللي ممكن يستغلوا قرار رفع سعر العيش عشان يزودو الأسعارزي مثلا المطاعم واللي ممكن تستغل القرار وترفع اسعار السندوتشات وتقولك عشان الحكومة رفعت سعر العيش المدعم.
كمان الحكومة طلعت ذكية ورمت قصة الغاء الدعم العيني اللي هو التموين في حجر الحوار المجتمعي وقالت الشعب هو اللي يقرر عاوز الدعم فلوس ولا زي ماهو دلوقتي ولو دعم نقدي ياترى كل بطاقة تموين هتاخد كام فلوس والمبلغ هيكون شهري ولا سنوي ولا نص سنوي أسئلة كتيرة لسه متعلقة في موضوع الدعم لكن واضح كده إن الحكومة ناوية تشيله وتشوف بديل مناسب علشان توفر تريليون جنيه كل سنة بتروح في الدعم .