لغز زيادة الدولار وهل السوق السوداء هترجع تاني

هو الدولار رجع ليه يزيد بقاله يومين وهل ياترى ده مؤشر إن فيه قفزات تانية جاية في الطريق وهل لو استمر كده هيوصل كام وهل ممكن نشوف سوق سودا من تاني.. يالا بينا نشوف إيه الحكاية وأصل البداية

النهاردة الدولار زاد في وسك النهار جوالي 35 قرش مرة واحدة وزاد امبارح حوالي 20 قرش وقرب على مستوى 48 جنيه تاني وسجل النهاردة في البنك الأهلي 47.47 جنيه وسجل في بنوك تانية 47.58 جنيه وبمقارنة أقل سعر وصله الدولار وهو تقريبا 46.50 جنيه تقريبا هنلاقي إن الدولار بينزل ويزيد في حدود أقل من 2 جنيه من بعد فترة الاتزان اللي حصلت بعد قرار التعويم في مارس اللي فات ووصل أقصى ارتفاع فيها لحدود 49 جنيه وبدأ بعدها يستقر في متوسط بين 46 و47 و48 جنيه وبنقول لحضراتكم الأرقام عشان ماتفتكرش إن فيه قفزات كبيرة أو صعود صاروخي للدولار وعشان نقولك إن دي الأسعار الطبيعية لحركة السوق وقانون العرض والطلب.
وسعر الدولار اللي نازل طالع ده دليل مهم ومؤشر اقتصادي صحي إن الدولار بقي فعلا حر ومحدش بيتحكم فيه وإن المركزي رفع ايده عن الجنيه وبقي على حريته قدام العملات كلها.. طيب نرجع لسؤالنا اللي في الأول ليه الدولار رجع يزيد بعد ما كان بينزل الأيام اللي فاتت.. زي ماقلنا لحضراتكم الموضوع كله بيحكمه العرض والطلب وطالما سعره زاد دلوقتي يبقي الطب على الدولار زاد أكيد سواء من المستوردين أو من الدولة نفسها واللي بتحتاج الدولار عشان تسدد ديون أو تدفع مستحقات الشركات الأجنبية أو عشان حتي تستورد بيه السلع الاستراتيجية.. الرك كله في قصة الدولار دي هو حجم المعروض واستدامة التدفقات وغير كده تقلق جدا وتخاف من ازمة نقص الدولار تاني ولو حصل نقص في المعروض يبقي السوق السودا هترجع تاني وهنشوف مضاربات وقفزات كبيرة.. لكن الواقع بيقول إن زمن السوق الموازية انتهي لان كل حاجة بقت على عينك ياتاجر والدولة مش هتحبس الدولار تاني والتوقعات والأرقام بتقول إن الحكومة عندها موارد كبيرة للعملة الأمريكية سواء قبضتها أو لسه هتيجي زي المبالغ اللي جت من صفقة راس الحكمة واللي لسه هتيجي من صندوق النقد والاتحاد الأوربي والبنك الدولي وضيف عليهم موارد الدولار اللي في الدولة واللي بتزيد زي التصدير والتحويلات والسياحة بخلاف قناة السويس واللي فيها مشكلة لكن لسه بتجيب مبالغ كويسة وغير طبعا الدولارات اللي جاية من صفقات الاستثمار التانية والاستثمار المباشر من الحجم التقيل..
الخلاصة إن عهد جنون الدولار انتهي واللي بيحصل عادي جدا وبيقول إن السوق ماشية صح وكل اللي على الدولة دلوقتي إنها توفر وتزيد وتنمي موارد العملة الخضرا عشان منشوفش سوق سودا.