رعب في الصاغة.. إيه اللي هيحصل الجمعة الجاية في سوق الدهب

ايه اللي هيحصل الجمعة الجاية في الصاغة المصرية، وليه الحكومة ساكتة لغاية دلوقتي وإيه مصير الاسعار في الأيام الجاية وإيه أفضل وقت تلحق نفسك فيه وتشتري.. كل ده هنعرفه مع حضراتكم في الفيديو ده.

كلنا بنتابع سوق الدهب بشكل يومي لأن مننا اللي عاوز يخطب وبيسأل عن سعر الشبكة وفيه اللي معاه قرشين وبيفكر يستمثر في المعدن الأصفر ويحفظ فلوسه ويكسب لما يجي يبيع وفيه ناس معاها دهب كتير وبتابع عشان تعرف الوقت المناسب إنها تبيع عشان تكسب والتجار بردو بيتابعوا أسعار الدهب عالميا وحركة السوق والعرض والطلب لأنه قطاع اقتصادي مهم جدا في مصر وفيه مليارات الجنيهات بتدخل في تجارة وشراء وبيع الدهب في مصر لانها أكبر سوق في المنطقة وأي تغير بيأثر على كل المنظومة.
طيب الدهب رايح على فين وإيه اللي هيحصل يوم الجمعة الجاية.. زي ما احنا عارفين إن سعر الدهب بيعتمد بشكل كبير على العرض والطلب وشفنا ازاي الأسعار ولعت في وقت الازمة لما مكانش فيه دهب في السوق والتجار حبسوه ودخلت الصاغة في الاوفر برايس واتعاملت على سعر دولار الدهب ب65 جنيه والجرام كان دخل على 4 الاف جنيه.
وعشان الدولة توزن السوق وقتها فكرت في حلول خارج الصندوق وكانت مبادرة السماح بدخول الدهب مع المغتربين المصريين في الخارج بدون جمارك والحقيقة المبادرة قدرت إنها تعمل حالة توازن في السوق ودخلت حوالي 4 طن ونص دهب للسوق وساعدت في هدوء الأسعار شوية.
الجديد إن المبادرة دي هتنتهي يوم الجمعة الجاية في 10 مايو تحديدا ولغاية دلوقتي مفيش لاحس ولا خبر عن تمديدها والتوقعات بتقول إن الحكومة مش هتمدها تاني عشان أزمة الدولار الأساسية واللي كانت رافعة أسعار المعدن الأصفر انتهت، لكن خبراء الدهب بيحذروا إن عدم تمديد المبادرة هيخلق فجوة في المعروض وزيادة في الطلب خاصة في موسم عيد الأضحى اللي جاي واللي بتكتر فيه مناسبات الخطوبة وزيادة عمليات الشراء وده معناه إن أسعار الدهب هترفع بشكل كبير في أيام العيد وهتوصل ذروتها في الوقت ده.
طيب طالما كده إيه الوقت المناسب للشراء والبيع.. أكيد طبعا إن الوقت الحالي هو انسب وقت تشتري فيه دهب للاستثمار قبل سعره ما ينزل وفي نفس الوقت افضل وقت للبيع هيكون في ذروة ارتفاع الأسعار الجاية.