الثلاثاء 18 يونيو 2024
رئيس التحرير
عمرو عامر
المشرف العام
عبدالعظيم حشيش
تحليل

تحركات عاجلة لحل أزمة جنون اللحوم.. شوف الدولة هتعمل إيه

الجمعة 03/مايو/2024 - 09:00 ص
اللحوم
اللحوم




اللحوم واحدة من الحاجات اللي سعرها لسه مرتفع جدا في الاسواق خصوصا إن اسعار الاعلاف انخفضت وبشكل كبير، وبالتالي كان لازم اسعار اللحوم والفراخ بالاسواق تنخفض مع انخفاض الاعلاف، وده لحد اللحظة دي محصلش، وعلشان الدولة بدأت في تعظيم مشروعات تربية وتثمين الثروة الحيوانية لتغطية احتياجات السوق المحلي وتقليل فاتورة الاستيراد.. يا تري اية اللي بتعمله الدولة علشان تقلل استيراد اللحوم.. ومتوقع اسعار اللحوم في الايام اللي جاية هيوصل لكام

الدولة في الفترة اللي فاتت استوردت لحوم بارقام كبيرة من دول من قارة افريقيا، وده رفع الفاتورة الاستيرادية للدولة المصرية لتغطية احتياجات السوق المحلي، وبالتالي كان لازم يكون في تحرك من الدولة لتقليل فاتورة الاستيراد وتعظيم المنتج المحلي من اللحوم ، وده مخطط كبير كل اجهزة الدولة شغالة عليه في كل المجالات مش اللحوم بس لتقليل فاتورة الاستيراد وزيادة فاتورة التصدير.
اية اللي بتعمله الدولة علشان تقلل فاتورة استيراد اللحوم؟.
الدولة لما لقت ان الفاتورة الاستيرادية من اللحوم مرتفعة جدا، خصصت ميزانية كبيرة للمشروع القومي لمشروعات تثمين وتربية الثروة الحيوانية واعلنت عن تخصيص برامج ومشروعات قومية لدعم صغار المزارعين والمربيين من أهمها تمويل المشروع القومي للبتلو بـ8 مليارات و263 مليون جنيه لحوالى 43 ألف مستفيد وباجمالي عدد رؤوس حوالى 500 ألف رأس ماشية.
جهود الدولة لتعظيم مشروعات تربية وتثمين الثروة الحيوانية مقفتش علي التربية وتخصيص رؤوس الاموال للمربيين بس.. لا دي شملت تنفيذ قوافل بيطرية مجانية لعلاج رؤوس المواشي وتقديم العلاج لأكثر من 2.3 مليون رأس ماشية، ده غير تطوير 281 مركز تجميع ألبان ده غير إنشاء 41 مركزا جديد لتجيع الألبان ضمن المبادرة الرئاسية حياة كريمة.
الدولة كمان اعلنت عن إنتاج واستيراد 4.5 مليون قصيبة نتج عنها نجاح تلقيح 2.2 مليون رأس من الماشية المحلية ضمن خطوات التحسين الوراثي لرؤوس الماشية والحصول على ولادات بتحمل صفات وراثية عالية الإنتاجية، ده غير استيراد أكثر من 82 ألف رأس ماشية من الاناث من السلالات عالية الإنتاجية وإنشاء وتطوير وتجهيز 1773 نقطة تلقيح اصطناعي بالوحدات البيطرية والانتهاء من تطوير وتشغيل 4 مراكز للتلقيح الاصطناعي في العامرية وسخا والعباسية وبني سويف،وتزويدهم بكل الأجهزة اللازمة.
وعلشان الدولة تحل ازمة نقص مصادر البروتين في الاسواق، عملت مشروعات الإنتاج الحيواني المتكامل فى كلاً من مدن السادات والفيوم ووادي النطرون والحمام، ده غير مشروعات الثروة السمكية  في بركة غليون والفيروز وقناة السويس ومثلث الديبة واطلقت  المشروع القومي لتنمية البحيرات وانشاء مفرخات زريعة الأسماك البحرية والجمبري وتطوير مفرخات المياه العذبة لزيادة إنتاجيتها وتوفير الزريعة المطلوبة لنهر النيل، ده غير طرح 21 موقع للاستزراع السمكي في الأقفاص في البحر الاحمر والبحر المتوسط على موقع هيئة الاستثمار قدام المستثمرين اللي حابين يستثمروا في مجالات الاستزراع السمكي.