الأربعاء 29 مايو 2024
رئيس التحرير
عمرو عامر
المشرف العام
عبدالعظيم حشيش
شمول مالي

لو بتسأل عن أخبار وأسعار السيارات..أقرأ هذا التقرير قبل ما تروح السوق

الأحد 21/أبريل/2024 - 03:20 ص
السيارات
السيارات


 
ايه اللي بيحصل في سوق السيارات دلوقتي وياترى ايه هو افضل وقت للشراء والبيع وايه توقعات الأسعار في الأيام الجاية وايه حكاية الدولار الجمركي .. لو عاوز تفاصيل كمل معانا لاخر التقرير وانت تعرف. 
 
رغم مرور وقت مش كتير علي تعويم الجنيه وتحرير سعر الصرف وبداية توفير الدولار في البنوك للمستوردين وأصحاب الشركات ومنهم طبعا مستوردي السيارات لتلبية الطلب المتراكم على السيارات من ساعة ظهور أزمة نقص الدولار في السوق المصري لكن الأسعار متحركتش بشكل كبير ناحية الانخفاض وكل الكلام عن تخفيضات في الأوفر برايس زي ما قلنا قبل كده في بانكير وهو المبلغ اللي بيحطه تاجر العربيات فوق السعر الطبيعي بعد مكسبه عشان يتحوط من تقلبات سعر الدولار ويبقي مكسبه في الأمان.
طيب ليه لغاية دلوقتي أسعار السيارات ما نزلتش بشكل كبير .. السؤال ده جاوب عليه المستشار أسامة أبو المجد نائب رئيس شعبة السيارات باتحاد الغرف التجارية بما قال إنّ انخفاض أسعار السيارات في السوق يتراوح حاليا بين 5 و10% ودي نسبة هزيلة جدا مقارنة بنسب وقفزات زيادة الأسعار في السيارات واللي وصلت 500% مرة واحدة.
وشعبة السيارات شايفة إن  تراجع ونهاية الدولار في السوق الموازية وراء الانخفاض في أسعار السيارات وقالت إنه فب الفترة اللي فاتت كان فيه مبالغة كبيرة في أسعار السيارات، تجاوزت فيها بعض الماركات «كل الحدود الحمراء»، وفق تعبير رئيس الشعبة.
طيب ايه حكاية الدولار الجمركي .. شوف حضرتك الدولار الجمركي ده بيكون سعر استرشادي للجمارك بتتعامل بيه الشركات والبنوك مع المستوردين عشان لو حصل تقلبات في سعر السوق يعني قيمة معينة لسعر الدولار عشان لو طلع ولا نزل المستورد والبنك يضمنوا حقهم. واللي حصل بقي ان تحرير سعر الصرف أو تعويم الجنيه أدى إلى زيادة سعر الدولار الجمركي من 30 جنيه إلى 50 جنيه، وده انعكس على ارتفاع أسعار جمارك السيارات المستوردة وبالتالي التاجر هيحملها على سعر العربية النهائي وفي الاخر الزبون أو المشتري هو اللي هيحاسب على كل حاجة... وحسب بيانات الشعبة زيادة سعر الدولار الجمركي تسبب في زيادة سعر العربية اللي كانت جمركها 300 ألف جنيه الي 560 ألف جنيه جمارك وخلى الانخفاض اللي عملته صفقة رأس الحكمة مش قوي، لكن الانخفاض بين 5 إلى 10 % هو الانخفاض الحقيقي في السوق.

وحسب بيانات السوق بردو أسعار السيارات الصينية اكتر انواع حصل فيها تخفيضات بعدما وصلت نسبة الانخفاض من 5 إلى 15%، ودلوقتي حجة الماركات المجمعة محليا بعدم تدبير الدولار راحت، حاليا البنوك بتتصل عليهم وده كلام اكبر مسؤول في سوق السيارات يعني مش كلام وخلاص.
طيب الحل ايه دلوقتي لو عاوز اشتري عربية جديدة.. الأفضل زي ما بيقول كل خبراء سوق العربيات انك تستنى شوية لغاية  الربع التالت او اخر 3 شهور من السنة دي، بعد فترة من الركود والاستقرار اللي عاشها السوق في الربع التاني من السنة ولو عاوز تبيع فدا الوقت المناسب قبل أسعار المستعمل ما تنزل أكتر من كده.