هتديهم فلوسك بإيدك.. خلي بالك من نصابين الذكاء الاصطناعي

 

كل يوم في 100 طريقة بيخترعها المحتالين والنصابين للاستيلاء على أموال ومدخرات الناس.. وكل يوم فيه حيلة جديدة وغريبة ومش هتخطر على بالك.. إيه أخر حيل النصابين وإيه حكاية النصب بالذكاء الاصطناعي اللي انتشرت بقوة في الفترة الأخيرة وإزاي تكتشفها.. تعالي نقولك

في قاعدة بتقول إن تطور التكنووجيا بيساويه على طول تطور في الجريمة وده اللي بنشوفه دلوقتي في حالات كتير أخرها مجال الذكاء الاطناعي والبرامج والتطبيقات واللي بقت مخيفة بشكل كبير نتجة سوء استغلالها من عصابات متخصصة في النصب الالكتروني..
بدأت الناس تكتشف عمليات النصب والاحتيال الإلكتروني واللي بيستخدم فيها الذكاء الاصطناعي عن طريق تركيب أصوات على صور أقارب وأصدقاء الضحية اللي هيتم الاتصال بيه وبيطلب منه إنه يحول له فلوس على رقم معين عشان عنده ظرف وانت لما تشوف صورة وصوت قريبك ولا صاحبك في زنقة لازم هتجري تبعتله إي مبلغ وفي النهاية تكتشف إن الموضوع كله نصب وتطبيق الكتروني داخل فيه ذكاؤ اصطناعي .

الجديد بقي إن التطبيقات دي تطورت وبقت مش مجرد وسيلة للنصب السريع لكن بقت برامج للمسابقات الوهمية والكسب عبر الانترنت وكانت أخرها توريط فنان مشهور جدا ومحبوب في عملية النصب بعد استغلال صورته وعمل فيديو عليها واستعانوا بصوته وهو بيروج للتطبيق الوهمي وبيقول للناس اشتركوا فيه ودا طبعا عشان يدي مصداقية لعملية الاحتيال ومش بس كده كمان العصابة اللي عاملة التطبيق بالذكاء الاصطناعي جايبين مقاطع فيديو لأشخاص من أكتر من مكان في العالم بتقول إنهم كسبو في التطبيق وطبعا مفبركين الصوت والصورة ولدرجة الفنان المصري طلع على صفحته الخاصة ونبه الناس إن الموضوع نصب وإنه ملهوش علاقة بالتطبيق ده وإن تم استغلال صورته وصوته.

ولو ركزنا شوية في مواقع التواصل الاجتماعي هنلاقي في الفترة اللي فاتت إن فيه فيديوهات كتيرة منتشرة عن تطبيقات جديدة لكسب الأموال والمراهنات وبتوهم الناس إنها ممكن تكسب الملايين وهي قاعدة في البيت وفي الأخر كل الفيديوهات دي معمولة بالذكاء الاصطناعي وبستخدموا صوت وصورة فنانين ومشاهير عشان يوقعوا الناس في الفخ..