مفاجاة صادمة عن مصير الدولار في البنوك.. الصفقات كلمة السر
فاكرين لما كان نفسنا نسمع كلمه حلوة عن الاقتصاد المصري ولا كلمة تفاؤل تبدد الوضع الصعب اللي مصر كانت عايشة فيه .. سبحان مغير الاحوال النهاردة العالم كله بيتكلم عن انطلاقة جديدة للاقتصاد المصري وقفزات في الاستثمار ومستقبل مبهر بعد هزيمة الدولار في معركة خاطفة بين الجنيه في رأس الحكمة.. طيب ايه اللي حصل وايه مصير الدولار..
شوف ياسيدي من ساعة الإعلان عن صفقة رأس الحكمة والدولار راح ومرجعش تاني ومن ساعتها وهو بينزل لغاية المركزي ما ضرب ضربته وحرر سعر الجنيه رسميا وبقي السعر حر وعرض وطلب واتحبس الدولار الاسود عند التجار واللي مش عارفين يعملوا فيه ايه بعد السوق الموازية ما وقفت حالها والناس رجعت تتعامل مع البنوك وشركات الصرافة خلاص وده الوضع الطبيعي والغريب بقي أن سعر الدولار بينزل في البنوك على مدار أسبوع كامل من ساعة تقريبا الاعلان عن تحرير سعر الصرف ووصل من أعلي سعر 50 جنيه لغاية 47.70 جنيه يعني بنتكلم على حوالي 5 جنيه في حوالي اسبوع تداولات بس وعشان كده طلع سؤال مهم إذا كان الدولار هبط كل ده في البنوك خلال اسبوع اومال ايه اللي هيحصل باقي الايام الجاية.
السؤال ده مبقاش صعب على اي حد لأن السوق بقي عرض وطلب خلاص ومفيش حاجة بتستخبي فيه وبقى محكوم بسعر السوق يعني ببساطة لو الدولار كتير في السوق اللي هي البنوك والطلب قليل يبقي السعر هينزل على طول قدام الجنيه ويارب يوصل حتي 5 جنيه ولو الطلب كتير على الدولار والمعروض قليل هيبفضل الدولار يرفع ع طول .. طيب دلوقتي ايه حالة السوق واللي هتحدد سعر الدولار بناء على العرض والطلب..
شوف ياسيدي.. التوقعات بتقول إن المركزي والحكومة منتظرين تدفقات دولارية ضخمة ومضمونة لغاية 3 سنين قدام ومثلا البنوك العالمية توقعت أن مصر هيدخلها 85 مليار دولار في ال3 سنين اللي جايين استثمارات مباشرة يعني فلوس هتدخل السوق مباشرة من الخارج وده غير مليارات صندوق النقد الدولي والاتحاد الأوروبي وباقي صفقات الاستثمار في رأس جميلة والمعلمين والساحل الشمالي والمناطق الصناعية التركية والصينية الضخمة.. ببساطة طول ما فيه دولار أعلى من الطلب الأسعار هتنزل .
