الجمعة 19 أبريل 2024
رئيس التحرير
عمرو عامر
المشرف العام
عبدالعظيم حشيش
فيديو بانكير

اللي معاه دولار سوق سوداء ياخد سيلفي معاه للذكرى.. إنهيار تام

الأحد 03/مارس/2024 - 10:37 م
الدولار
الدولار

 

صدقت السوق واشتريت دهب بالغالي وتاجرت في السوق السوداء للدولار عشان تعمل ثروة .. اللي اشترى دهب هيعمل ايه واللي تاجر في أزمة الدولار مصيره إيه.. تعالي نقولك
 


ناس كتير عاشت فترة هوجة الدهب وصدقت الكلام اللي اتقال إن سعره هيعدي ال5 آلاف جنيه وقالت اشتري على قدر ما اقدر وسحبت مدخراتها وتحويشة العمر واشترت سبايك وجنيهات دهب ومش عارفة تعمل ايه دلوقتي بعد ما اسعار الدهب انهارت وقربت ترجع لأسعار قبل الأزمة اصلا يعني انت لو اشتريت الجرام في عز الأزمة ب4500 جنيه و النهاردة سعره اقل من 3 آلاف جنيه يبقي بحسبة السوق خسرت من ناحيتين الاولى في فرق الأسعار والتانية إن الدهب اللي معاك هيتعامل على أنه مستعمل.
لكن متقلقش عامة الدهب مش بيخسر وهو استثمار أصلا طويل الأجل والمفروض تستني عليه 3 سنين على الأقل عشان يجيب سعره وتكسب فيه والدهب بردو فلوس محفوظة لكن انت اتسرعت ولو كنت اشتريت بفلوس الدهب شهادات ادخار كان زمانك بتاخد فايدة كبيرة وفلوسك محفوظة من الاخر مش قدامك غير  حلين ياتبيع دلوقتي وتخسر يااما تصبر وتاخد فلوسك بعد كام سنة ولو بالنسبة والتناسب بردو انت خسران لأن الفلوس واللي انت حولتها لدهب مركونة ومش شغالة يعني متجمدة ولو كنت شغلتها كانت جابت عائد كبير دلوقتي سواء لو حطيتها في أي مشروع أو استثمرتها في البنوك.
أما لو انت استغليت الأزمة واشتريت بفلوسك ومدخراتك دولار من السوق السوداء وخزنته لما كان بقي ب70 وانت طالع عشان تكسب من فرق السعر وتعمل ثروة من المضاربة في السوق السودا فأنت كده خسرت كل حاجة لكنك اشتغلت في الممنوع وتجارت في المخالف والدولار اللي معاك بقي تهمة ومش هتقدر تصرفه لأنك لو روحت بيه اي مكان هيتقالك من اين لك هذا.. وخلاص بقي مفيش سوق سودا للدولار بعد ماقفلت ومفيهاش تداول والاسعار مبقتش تستاهل المخاطرة والدولار فيها داخل على سعر البنك دلوقتي.

هتقولي طيب اعمل ايه بالدولار اللي معايا.. هقولك في نفس واحد بله وأشرب ميته لانك اشتغلت في سوق حرام ومخالفة وغير مشروعة وزي ما الناس دفعت تمن جشعكم ورفعتم الأسعار وكنتوا السبب في غلاء المعيشة جي دلوقتي دوركم عشان تدفعوا التمن وتخسروا كل اللي جمعتوه مرة واحدة لكن فيه حل تاني عشان تستفيدوا من الدولار اللي خزنتوه وهو ممكن تتصوروا معاه سلفي وتنشروها على الفيس وهنا طبعا الداخلية هشتوفك وتجيبك انت والدولارات.