طاقة بريكس فتحت لمصر.. السياحة المصرية تدخل سوق الـ2 مليار سايح
ازاي البريكس هتكون بوابة الخير لمصر وامتي وازاي.. تعالوا نشوف مع بعض
بريكس طلعت قماش ومصر انفتحت لها طاقة القدر والسياحة في سوق بيعدي ال2 مليار نسمة هتكون قدامهم فرص وتسهيلات كبيرة عشان يزورون مصر تخيل من ال2 مليار شخص في سوق السياحة في بريكس زارك منهم بس 100 مليون في السنة تخيل حجم الإيرادات اللي ممكن تيجي مصر بقطاع السياحة بس اكيد ممكن تتخيل بما تعرف إن أقصي إيرادات سياحة مصر عملتها كانت حوالي 14 مليار دولار استقبلت فيهم 14 مليون سائح وده كان في موسم2022/2023 وتقدر تحسب بقي لو جالك 50 أو 100 مليون سائح يبقي مصر هتعمل ايه ساعتها وخلي بالك ده في قطاع واحد بس هو قطاع السياحة.
انضمام مصر لـ مجموعة "بريكس" كان نقطة تحول مفيش كلام قدام السياحة المصرية المتنوعة والفريدة على مستوى العالم وبحسب إحصاءات منظمة السياحة العالمية بيمثل مواطني دول تكتل بريكس 25% من سائحي العالم، وتعتبر الصين السوق الأكبر والأضخم في تصدير السائحين.
وحسب مركز المعلومات ودعم اتخاذ القرار، التابع بمجلس الوزراء، بلغ حجم اقتصاد مجموعة بريكس 25.6% من الاقتصاد العالمي، بما يعادل 26 تريليون دولار، وده في سنة 2022، وبعد انضمام الدول الـ 6 الجديدة وبينهم مصر إلى المجموعة الاقتصادية هيقفز حجم اقتصاد بريكس الي 30% من الاقتصاد العالمي، بما يعادل 29 تريليون دولار.
وزارة السياحة والآثار بتتوقع زيادة في عدد السياح من دول مجموعة بريكس وإن فيه فرصة كبيرة لنمو عدد السياح وقبل ما ندخل بريكس كانت أصلا السوق الصيني والروسي من اكتر الأسواق اللي بتصدر السياح لمصر ومن خلال بريكس مصر هتوصل اسرع في تحقيق مهمة ال30 مليون سائح قبل حلول 2028، ومع المزايا والتسهيلات في إجراءات السفر والرحلات وغيرها من المزايا اللي هتقدمها مصر هتتفتح قدامها كل الاسواق اللي في بريكس.
