تفاحة آدم وبرتقالة عم ربيع.. حكاية الفكهاني اللي قلبت العالم
عشان تبقي انسان مش شرط تكون فقير لكن كفاية يكون عندك قلب زي قلب عم ربيع.. الفكهاني الجدع اللي العالم كله بيتكلم عنه واللي وصل رسالة بمليون لغة للدنيا كلها اني دي طبيعة وعظمة الشعب المصري اللي يغرف من قوته ويدي غيره طالما كان محتاج..
عم ربيع مفكرش ثانية واحدة وبمجرد ما عدت قدامه عربيات المساعدات المصرية اللي رايحة غزة راح يجري ويحدف عليها برتقال ويوسفي وكان بيزعق عشان العربيات تقف ويديها كل البرتقال اللي عنده وكأنه بعت مع برتقاله رسالة للحبايب والأطفال والعجايز والأرامل في غزة بتقولهم شدو حيلكم احنا معاكم ودوقوا من برتقال عم ربيع..
اللي عمله الفكهاني المصري البسيط بيمثل أعمق معاني الإنسانية والدبلوماسية وفكر الناس اللي حولينا بمعدن الشعب المصري اللي في عز شدته ضهر لإخواته العرب ودي سر قوة وعظمة وجلال مصر . الفكهاني رغم الظروف الاقتصادية الصعبة وتجارته المحدودة مترددش أنه يتبرع بيها كلها لاهالينا في غزة .. الفيديو لف العالم ودول وحكومات وأجهزة درسته كويس ومعداش عليها كده وخلاص لأن تصرف عمي ربيع مؤشر على طريقة تفكير المصريين في اللي بيحصل بغزة وقالوا إذا كان راجل فقير وعلى قد حاله عمل كده اومال باقي الشعب هيعمل ايه.. جايز انت متعرفش تصرف الراجل الصعيدي الجدع ده اهميته ايه للقضية الفلسطينية لكن صدقني خدمها اكتر من اي جهود سياسية وقالهم إن مصر قلبا وقالبا مع فلسطين ومع الحق.
في اسرائيل بردوا فهموا رسالة عمي ربيع كويس جدا إن مصر مش هنسيب خواتها وساعة الغضب مش بتشوف قدامها ولا حاجة بتقف قصادها واكيد فكروا كتير بعدها..
برتقالة عم ربيع بقت مشهورة جدا وتقدر تحطها جمب تفاحه ادم اللي غيرت مصير البشرية وتقدر تعتبر برتقالة عن ربيع هتغير مصير القضية.
