مستر اكس.. حكاية عفاريت الدولار وملايين تحت الأرض

أزمة الدولار اللي عشناها من سنة بالظبط وسعره اللي عدى الحدود في شهور قليلة كانت فرصة لناس كتير أنها تغني وتكسب وتحقق ثروات بملايين الملايين دولار وعملات وحنيه .. ومع طول أمد الأزمة ظهرت شبكات جديدة وعصابات ووسطاء وفئات جديدة في سوق العملة السودا بعد ما كانت مقتصرة على أصحاب أو موظفي الصرافات زمان وكانوا زباينهم قليلين لكن دلوقتي الموضوع خد شكل بيزنس وملايين رايحة جاية وثروات بتتعمل في يومين علشان كده شفنا التوحش في السوق السودا وبدأت المضاربة والمنافسة بين التجار نفسهم والموضوع بقي صراع ومنافسة ومضاربة زي المزادات وشفنا ازاي الدولار وصل73 جنيه.
في وسط الصراع الرهيب على المكسب في السوق السوداء ظهرت طائفة العفاريت ودول مجموعة من التجار مهمتهم يشغلوا فلوس ناس تانية في السوق السوداء للدولار زي كده فكرة للكستريح واللي بياخد فلوس الناس ويشغلها في تجارة الأجهزة الكهربائية أو العقارات.. ومن ورا كده التجار يكسبوا وأصحاب الفلوس اللي محدش يعرفهم ولا بيظهروا في السوق يبقوا أصحاب ثروات كبيرة من غير ما يشيلوا دولار واحد لكن عندهم وكيل شغال في السوق أو مستر اكس زي ما بيسموه وهو اللي بيتولي شراء الدولار في السوق السوداء وإعادة بيعها لما سعرها يعلى وأحيانا يضارب بيها أو يبيع الدولار جملة لحوت كبير من حيتان العملة واللي بيتعامل مع ناس تقيلة زي رجال الأعمال أو المستوردين الكبار.