مصر تغرق في الديون بسبب “كباري السيسي” والبلد داخلة على مجاعة.. هنقولك إيه اللي بيحصل

يا عم مصر بقت غرقانة في الديون ومش هتقوم لها قومة تاني.. يا باشا البنوك هتفلس وفلوس الناس هتروح عليها وابقا شوف بقا مين هيديك فلوسك.. يا معلم السيسي عمال ياخد قروض ويغرق البلد عشان يبني كباري هي البلد ناقصة كباري أصلا… يا استاذ الدولار اختفى من البنوك وسعره هيعدى ال 100 جنيه ومش هنلاقي ناكل.. أكيد حضرتك فى الأيام اللى فاتت سمعت ناس حواليك كتير بيقولوا الكلام ده وبيبشروا بأيام سودا جاية وناس تانية بتتمنى سقوط مصر وناس تالتة مستعدة تعمل أي حاجة والبلد دي ما تتقدمش خطوة للامام.. بس يا ترى الكلام اللى بيقولوه ده صحيح ولا لأ .. يعنى هل فعلا مصر ممكن تفلس فى يوم من الأيام ؟ وهل فلوس الناس ومدخراتهم فى البنوك فعلا في خطر؟

في البداية كده وعشان نبقا على نور.. لازم نكون عارفين ان مصر بتمر بأزمة اقتصادية طاحنة زيها زي دول كتير فى العالم بتعانى بشكل واضح فى اخر سنتين بسبب تداعيات الحرب الروسية الاوكرانية واللى كان ليها انعكاسات على أسعار الطاقة والحبوب وسلاسل الامداد وده أدى الى ارتفاع اسعار السلع بصورة غير مسبوقة وأدى الى أزمة عملة طاحنة بسبب الفجوة التمويلية فى الموازنة العامة

حد هيسأل ويقول يعنى ايه فجوة تمويلية ؟

بص يا سيدي .. كل دولة بتعمل سنويا حاجة اسمها الموازنة العامة اللي هي بتحدد فيها هتصرف كام وهيدخلها موارد أد إيه يعنى فى حالة مصر الحكومة بتحسب هيدخلهام كام من الصادرات وقناة السويس والسياحة والضرايب ومصادر تانية كتير وفى نفس الوقت بتحسب هتشترى قمح وبترول وباقي صادرات بكام والفجوة التمويلية فى الموازنة بتحصل لما الحكومة مثلا تكون حاطة سعر لبرميلا النفط 60 دولار والسعر يرتفع بشكل مفاجئ زي ما حصل بعد اندلاع الحرب الروسية الاوكراني ووصل وقتها سعر البرميل الى 120 دولار يعنى زيادة 100% تقريبا والفرق بين السعر اللى الحكومة حاطاه والسعر اللى ارتفع بصورة مفاجئة هو الفجوة التمويلية

طب فهمنا الفجوة التمويلية .. هتقول ايه بقا على الديون هل مصر مش مديونة ودي اشاعات ؟

لا طبعا مش اشاعات ولا حاجة مصر فعلا مديونة وعليها ديون لمؤسسات تمويل دولية وحجم ديونها كبير مش صغير بس مش مصر بس اللى بتلجأ لمؤسسات التمويل عشان تسد العجز الموجود عندها وكفاية تعرف ان دولة عظمى زي الولايات المتحدة الأمريكية عليها هي كمان ديون وكان فيه أزمة كبيرة السنة اللى فاتت بين الكونجرس والبيت الأبيض بسبب تجاوز سقف الديون .. يعنى كل الدول ممكن تقترض عادي .. بس الفكرة والسؤال المهم هو هل حجم ديونك فى الحدود الآمنة المتعارف عليها دوليا ولا تجاوز مرحلة الخطر ؟

وفى حالة مصـر فاحنا الحمد لله ضمـن الحـدود الآمنـة فيمـا يتعلـق بمؤشـر نسـبة الديـن الخارجـى إلـى الناتـج المحلـى الإجمالـى.. والنسبة فى مصر وصلت إلى 34.1% فى حين أن حـدود المخاطـر القصـوى 50% وفيه مؤشرات ايجابية كتيرة فيما يتعلق بهيكل الدين الخارجى لمصر أبرزها تنـوع أدوات الديـن الخارجـى مـا بيـن قـروض، وودائـع، وسـندات مصـدرة، وتسـهيلات ائتمانيـة قصيـرة الأجـل، ومخصصـات مصـر لـدى صنـدوق النقـد الدولى

وفيه كمان مجموعة من العوامل المتزامنة بتعزز من  قدرة مصر على الوفاء بالتزاماتها الخارجية، وسداد الاستحقاقات الدولية، وفقا للجداول الزمنية المحددة، خصوصا  مع الاستمرار في زيادة حجم الناتج المحلي الإجمالي، وفي ضوء المؤشرات الاقتصادية ذات الصلة، من بينها ارتفاع الصادرات وعوائد القطاع السياحي وقناة السويس والاستثمارات المباشرة.

ووفقا لتصريحات سابقة لوزير المالية ، محمد معيط، مصر لم تتخلف عن سداد الاستحقاقات المالية في مواعيدها، وقادرة على ده مستقبلاً كمان، وبشهادة المؤسسات الدولية، الأمر اللي من شأنها منح الثقة لقطاع الأعمال الدولي في أداء الاقتصاد المصري وآفاق تطوره في السنوات الجاية.

وايه حقيقة استخدام فلوس القروض اللى بناخدها فى انشاء كباري جديدة.. هي البلد ناقصة كباري ؟

القروض اللى مصر بتحصل عليها من مؤسسات دولية بيتم استخدامها فى سداد الالتزامات الخارجية وتزويد الاحتياطي النقدي فى البنك المركزي ومفيش دولار واحد من فلوس القروض تم استخدامه فى انشاء الكباري الجديدة اللى بتنفذها الدولة وتمويل مشروعات الطرق والكباري بيتم تمويلها من ميزانية وزارة النقل المعتمدة بشكل رئيسي على مخصصات الوزارة فى الموازنة العامة يعنى الكبارى دي ممولة من الموازنة مش من فلوس القروض

اما بقا بخصوص سؤال هي البلد ناقصة كباري.. فلو حضرتك سالت اى حد فى الشارع ايه اهم مشروعات حصلت فى مصر اخر 10 سنين هيقولك الطفرة اللى حصلت فى الطرق والكباري وكفاية ان دلوقتى فيه مشاوير كانت بتاخد بالساعتين والتلاتة بقت تخلص فى نص ساعة بسبب الكبارى والمحاور الجديدة واى بلد بتخطط لزيادة الانتاج لازم يكون عندها شبكة طرق وكباري قوية

والرئيس السيسي، جاوب بنفسه على سؤال ليه بيبني كباري؟ وقال  إن اهتمامه ببناء الكباري والطرق نابع من حرصه على الأجيال الجاية في ظل الزيادة السكانية الكبيرة.

ولما هي الأمور حلوة أوي كده ومستقرة ليه الحكومة هتطبع ورقة نقدية جديدة بفئة 500 جنيه ؟

مش كل حاجة تسمعها تصدقها مفيش تفكير أصلا فى طباعة ورقة نقدية بفئة 500 جنيه ولو فيه أى حاجة كنت هتلاقي البنك المركزي المصدر الوحيد اللى ممكن تاخد منه معلومة زي دي بيعلن عن الموضوع أصل هيخبي حاجة زي كده ليه.. وخد بالك فيه ناس كل شغلها فى الحياة الهبد ونشر الشائعات وتخويف الناس من بكره وزي ما قولنالكم فى بداية الفيديو مصر الأوضاع فيها مش أحسن حاجة وفيه مشاكل وتحديات صعبة بتواجه الحكومة لكن فى نفس الوقت الدنيا مش بايظة ولا خربانة زي ما فيه ناس بتحول تصور

الله .. يعنى مفيش مجاعة هتحصل فى مصر الأيام الجاية ؟

دي برضوا واحدة من الشائعات المضحكة .. مصر بلد كبيرة وكل حاجة فيها متوزفرة روح حضرتك اى سوق او سوبر ماركت أو هايبر واسال على اى سلعة هتلاقيها موجودة .. آه ممكن سعرها يكون غالي شوية بسبب ازمة العملة الأجنبية لكن مفيش نقص فى اى سلعة بفضل الله

وخد بالك مصر دولة زراعية وبتنتج جزء كبير من احتياجاتها وفكرة ان البلد يحصل فيها مجاعة دي من سابع المستحيلات وعمرها ما حصلت فى مصر من يوم ما ربنا خلق الدنيا

طب ليه الدولار مختفى ومش موجود فى البنوك ؟

فيه أزمة فعلا في العملة الأجنبية وده اللى خلا السوق السودا للدولار تنشط بشكل كبير الفترة اللى فاتت وسعر العملة الأمريكية يوصل الى 58 جنيه مرة واحدة بس فى عز الأزمة دي الحكومة وفرت اكتر من 72 مليار دولار فى اخر سنة للافراج الجمركي عن البضايع المستوردة منها سلع استراتيجية بقيمة 19.1 مليار دولار، ومستلزمات وخامات للإنتاج بقيمة 33.3 مليار دولار.. ومفيش بلد فيها شح فى العملة تقدر توفر المبلغ ده بسهولة بس مصر عندها موارد دولارية مش قليلة بتيجي من الصادرات والسياحة وقناة السويس وتحويلات المصريين فى الخارج