مفاجأة تعيد الثقة في الاقتصاد المصري.. 5 مليار دولار دولارات جت في وقتها
رغم الأزمات والسوق السودا للدولار وارتفاع الأسعار لكن فيه انجازات وشغل في البلد بيقول أننا هنكمل وهنعدى من كل ده زي ما قال الرئيس السيسي.. ايه اللي حصل في قطاع السياحة وايه حكاية ال5 مليار دولار اللي جايين في وقتهم وليه دولار السياحة اهم دولار بيدخل البلد بعد قناة السويس
زي ما احنا عارفين مصر عندها موارد دولارية معروفة يعني بتدخل عملة صعبة زي قناة السويس والسياحة وتحويلات المصريين والصادرات والاستثمار المباشر وفيه موارد تانية بس اقل من المصادر الرئيسية زي المنح والودايع والقروض لكن دولار قناة السويس والسياحة بيكون ايه قيمة مضافة وبينفع البلد اكتر من دولار التحويلات والتصدير والاستثمار ودا لأن دولار قناة السويس بيجي من حاجة خدمية مش بتكلف الدولة كتير يعني قناة السويس بتجيب دولارات لكن مصاريفها قليلة بتنحسر في مرتبات العاملين في الهيئة والصيانة وعشان كده الدولار بتاعها زي ما بيقول المصريين كده فيه بركة وبعديه يجي دولار السياحة واللي بردو بيدخل البلد مقابل خدمات وزيارات المناطق السياحية والأثرية ودا غير إن قطاع السياحة بيشغل عمالة كتير بطريقة مباشرة وغير مباشرة على عكس دولار الصادرات مثلاً لان المصانع مصاريفها كتير صيانة ومكن جديد واستيراد مواد خام ومصاريف نقف وشحن وحاجات كتير اما دولار التحويلات فدا الدولة مش بتاخد لانه بتاع المصريين وكل اللي بتعمله أنها بتحويله من دولار لجنيه يعني بتدفع قيمته.
ليه بنقول الكلام ده دلوقتي .. عشان حاجة مهمة جدا ومؤشر ثقة جديد في الاقتصاد المصري بيقول أننا عندنا إمكانيات نعدي من أخطر الأزمات والخبر بيقول إن مصر حققت أعلى إيرادات سياحية في الربع الأول من العام المالي الحالي 2024/2023 على الإطلاق، برقم 4.45 مليار دولار بارتفاع 9% مقارنة بنفس الفترة من العام المالي اللي قبله بحسب بيانات البنك المركزي المصري. وعشان نفهم إزاي البنك بيعلن عن نتايج ربع السنة الجديدة وهي لسه في أول شهر بنقول لحضرتك أن السنة المالية في مصر بتبدأ في الأول من يوليو وبتتهي في 30 يونيو من كل عام وكده يبقي البيان منطقي.
إيرادات السياحة في مصر قفزت من 8 مليار دولار إلى 13.6 مليار دولار، في السنة اللي فاتت (2022-2023)، بزيادة 26.8 في المية بعد تعافي قطاع السياحة من تداعيات جائحة كورونا والحرب الروسية الأوكرانية والاهم إن الحكومة مستهدفة 45 مليار دولار على 2030،.. يعني باختصار السياحة جابت حوالي 5 مليار دولار في 3شهور أو 90 يوم ودي معجزة لأن دولار السياحة زي ما قلنا قيمته أعلى بكتير من اي دولار تاني يعني ال5 مليار دولار دول ممكن يساوي 20 مليار دولار بتاعة التصدير بسبب التكلفة هنا وهناك وعشان كده فرنسا واسبانيا مصدر ثرواتهم وثرائهم بسبب السياحة الضخمة اللي بتيجي عندهم كل سنة.
لو مصر اشتغلت على السياحة بس هتقدر تعدي اي أزمات لأنه قطاع ممكن يجيب 100 مليار دولار كل سنة ودا مش كتير علي دولة عندها آثار مش موجوده غير عندها ودا غير القاهرة الإسلامية والقبطية والشواطئ والفنادق والقرى السياحية وسياحة الترفيه والعلاج واليخوت يعني قطاع قادر يجري بالاقتصاد المصري لوحده
