النور هيقطع 10 دقايق بس.. تطور جديد في أزمة الكهربا

لسه أزمة قطع الكهربا وتخفيف الأحمال مستمرة.. وواضح كمان انها لسه مكملة معانا شوية..  وده لأن الحكومة زي ما خلاص كلنا بقينا عارفين بتحاول توفر وتخفف الضغط على الوقود المستخدم فى انتاج الاف الكيلواتات من محطات انتاج الكهرباء يوميا.. فيا ترى ايه الجديد فى الأزمة ؟ وامتى ممكن نشوف نهاية لقطع التيار الكهربائي ؟ وهل الكهربا هتفضل تقطع ساعتين يوميا؟

فى تطورات جديدة لأزمة انقطاع التيار الكهربائي كشفت  مصادر بارزة بوزارة الكهرباء عن استمرار تخفيف أحمال الكهرباء في مصر لغاية شهر مارس الجاي بسبب انخفاض كميات الوقود المورد لمحطات الإنتاج للاستفادة من تصدير الغاز خلال الشهور الجاية باعتباره مورد مهم من موارد توفير الدولار فى وقت بتعانى فيه الحكومة من أزمة حادة فى شح العملة الأجنبية.

ووفقا للمصادر تخفيف الأحمال اليومي هيتراوح بين 600 إلى 800 ميجاواط، وهيتم توزيع القدرات على جميع محافظات الجمهورية بما لا يتجاوز 10 دقائق .. يعنى النور هيقطع فى كل مصر بعدد دقايق واحد وفقا لجداول تخفيف الحمال لكن الجديد ان زمن انقطاع التيار مش هيزيد على ال 10 دقايق.

وهيتم خلال الايام الجاية  تشكيل لجنة من عدة وزارات لوضع سيناريوهات لخطة تخفيف الأحمال بما لا يضر مصلحة المواطنين وفي نفس الوقت لا يكبد الدولة أعباء دولارية إضافية لاستيراد المازوت.

وبيبلغ الاحتياطي الاستراتيجي لوزارة الكهرباء من المازوت حالياً بخلاف الإمدادات اليومية من وزارة البترول المصرية  150 ألف طن، والإمدادات اليومية الواردة من وزارة البترول بشأن المازوت تتراوح بين 10 إلى 12 ألف طن مازوت

السيناريوهات المتوقع مناقشاتها في اللجنة المقرر انعقادها خلال أيام بتتضمن مقترحات بتحديد موعد لغلق المحال التجارية والمقاهي عند منتصف الليل وكمان إقامة مباريات كرة القدم والأنشطة الرياضية بالنهار قدر الإمكان

وممكن الحكومة ترجع  لتطبيق نظام العمل من المنزل لكافة العاملين يوم من كل أسبوع لكن المقترح ده لسه مطروح على طاولة اللجنة الحكومية وبيتم مناقشته من كل الأبعاد وفى حال تطبيقه هيساهم في حل أزمة تخفيف الأحمال بشكل مؤقت

وبشهد مصر من يوليو اللى فات  أزمة كهرباء هي الأولى من نوعها من 2014 بررتها الحكومة وقتها بأنها ناتجة عن موجة الحر اللي ضربت البلاد ما دفعها إلى تخفيف الأحمال.

ووعدت الحكومة حينها بحل الأزمة عبر توفير الاحتياجات اللازمة من المواد البترولية لشبكات الكهرباء ورفع ضغط الغاز.

وأعلن رئيس الوزراء المصري مصطفى مدبولي وقتها عن استيراد شحنات إضافية من المازوت لمحطات الكهرباء بقيمة 300 مليون دولار.

وتحتاج وزارة الكهرباء يومياً لنحو 135 مليون متر مكعب من الغاز، و10 آلاف طن من المازوت، حتى تنتهي الانقطاعات المتكررة للكهرباء في مصر.