الدهب ولع والعقارات رفعت.. هنقولك تشغل فلوسك فين

لو معاك قرشين شايلهم على جمب ومش عارف تشغلهم فين هنقولك على أفضل طريقتين تكبر بيها مدخراتك في الأيام الصعبة دي 
 

 
في الطبيعي خبراء الاقتصاد بينصحوا باستثمار المدخرات أو الفلوس السايلة الزيادة مع المواطنين في 3 حاجات أساسية  الاول الدهب باعتباره استثمار متوسط وطويل الأجل والعقار ودا بردوا استثمار طويل الأجل وفي الحالتين دول انت بتشتري دهب أو عقار وتسيبهم فترة مش أقل من 3 سنين عشان تحفظ فلوسك وتزودها بشكل كبير بدل ماهي مركونة ولأن الدهب ولع ولسه هيزيد زي ما خبراء السوق بيقولوا يبقي هتشتري بالغالي ودلوقتي وقت البيع مش الشراء يبقي الدهب مش هو الاستثمار المثالي دلوقتي ونفس الحال في العقارات واللي سعرها ضرب في العالي بعد ارتفاع أسعار مواد البناء.

طيب طالما الاستثمار في الدهب والعقارات دلوقتي مش مجدي هتستثمر في إيه.. شوف حضرتك دلوقتي قدام حل من اتنين ياتستثمر فلوسك في مشروع مضمون المكسب تضمن بيه راسك مالك وفي نفس الوقت فلوسك بتطلع أرباح كل يوم أو كل شهر وممكن تستخدم الأرباح كمان في توسيع نشاطك عشان يجيب أرباح اكتر واهي الدايرة شغالة.. لكن لو مش فاضي وعندك شغل واخد وقتك ومش فاضي للمشروع يبقي مفيش حل قدامك غير تشتري بفلوسك شهادات ادخار بنكية بعائد كبير ويبقي أصل فلوسك قاعدة وبتاخد أرباح طول مدة الشهادة وانت قاعد مرتاح وبتشوق مصالحك التانية

ولو مش عارف ايه الشهادات اللي في البنوك وعائداتها كام هنقولك عليها .. أكبر شهادات ادخار موجودة في البنك الأهلي المتحد ، وهي بعائد ثابت واسمها شهادة "بريميم" الأعلى في مصر، بعائد 20% سنويًا، ويصرف شهريًا، ومدة الشهادة 3 سنين والحد الأدنى للشراء 500 ألف جنيه.

كمان البنك الأهلي المصري بيقدم الشهادة البلاتينية بعائد 19% سنويا، ويصرف شهريًا، والشهادة مدتها بردوا 3 سنين وبالنسبة للحد الأدنى للشراء فهو ألف جنيه ومضاعفاتها وفي شهادة بنفس المميزات في  بنك مصر واسمها شهادة القمة وبنفس العائد والمدة.
البنك التجاري الدولي كمان بيقدملك الشهادة الثلاثية بريميم للعائد الثابت، بسعر فايدة 18% سنوياً، ويصرف العائد شهرياً، وتبدأ الشهادة بحد أدنى للبيع مليون جنيه.