إيه اللي هيحصل في 1 يناير اللي جاي.. وإزاي مصر هتستفيد من عضوية البريكس

في أول يناير اللي جاي مصر هتنضم رسميا لتجمع بريكس واللي بيضم دول عظمى زي الصين والهند وروسيا بجانب دول تانية مجموع سكانها تقريبا نص سكان كوكب الأرض تقريبا.. ايه اللي هيحصل لما مصر تنضم رسميا للبريكس وإيه اللي هستفادو وإزاي هيتم التعامل في نظام المدفوعات الالكترونية بين مصر وبقية أعضاء البريكس
 

طبعا انضمام مصر للبريكس فرصة عظيمة عشان تحرر اقتصاد مصر من تبعية الدولار ولو جزئيا ودا كان السبب الأكبر وراء طلب القاهرة العضوية للبريكس لأنه على حسب النظام الداخلي للتجمع المعاملات البينية بين الدول الأعضاء بتم بالعملات الوطنية ومصر هتوفر 32 مليار دولار تقريبا بمجرد دخولها البريكس لأن المبلغ دا هو حجم التبادل التجاري بين مصر دلوقتي وبين دول التحالف وكمان مصر هترفع من حجم التبادل دا مع دول البريكس وهتقلل التبادل مع دول تانية بتتعامل بالدولار ودا لتقيل أكبر قدر ممكن من الاعتماد على العملة الأمريكية
كمان مصر هتستفاد من عضوية بريكس بترويج فرصها الاستثمارية في داخل تجمع البريكس لأن ساعتها هيكون ليها الأولوية حسب نظام المجموعة يعني دول بريكس ملزمة تستثمر في أسواق الدول الأعضاء قبل الأسواق التانية  وكلنا عارفين حجم الفرص الاستثمارية الضخمة في مصر واللي تستوعب مئات المليارات من الدولارات سواء في المدن الاقتصادية أوالصناعية أو اللوجستيات وخدمات النقل بجانب السياحة والزراعة والتعدين.
مصر هتستفاد بردوا من دخول البريكس من خلال تلقي تمويلات كبيرة من بنك التنمية الجديد التابع لبريكس واللي بيدي قروض بفايدة أقل من باقي المؤسسات المالية الدولية زي البنك الدولي وصندوق النقد وكمان بمدة سداد طويلة ودا غير برامج مالية تانية كبيرة هتحصل عليها مصر.
ومصر كمان هتستفاد من دا كله في تقليل الاعتماد على الدولار واللي سعره هينزل طبعا في السوق المحلي نتيجة قلة الطلب عليه وبالتالي الأسعار هتنزل بشكل كبير جدا وقيمة الجنيه هترفع كمان بسبب الطلب عليه في دول بريكس وقدام الدولار لأول مرة حسب قانون العرض والطلب.

ومن بين مكاسب انضمام مصر لدول البريكس هي زيادة عدد السياح القادمين إلى مصر، بالتزامن مع تطلع الدولة المصرية لجذب 30 مليون سائح بحلول 5 سنين، وخاصة أن دول البريكس بتمتلك قدرات اقتصادية كبيرة، وكمان خلق فرصة لتنشيط الصادرات المصرية، بما يخفف الضغط على النقد الأجنبى وتعزيز حركة التبادل التجارى مع دول المجموعة، فضلًا عن الحصول على منتجات ومواد خام بأسعار منخفضة.

نيجي بقي لسؤال ازاي هيتم التعامل بين مواطني الدول الأعضاء في البريكس من خلال المدفوعات الالكترونية مثلا وهيكون ليها سيستم معين ولا الموضوع هيمشي إزاي.. وطبعا زي ما احنا عارفين دا تكتل كبير وواسع جدا وأكيد هتكون فيه منظومات مالية خاصة بدول البريكس تتيح ليهم مميزات للتعامل فيما بين الأفراد من مختلف دول البريكس ودا اللي أكده مسؤول روسي في اجتماع البريكس اللي فات وإعلانه تأييد التحالف لفكرة إقامة نظام مدفوعات مشترك لتسهيل البيع والشراء سواء للأفراد أو الشركات بين دول البريكس وبالعملة المحلية كمان يعني قريب جدا هتقدر تشتري بالجنيه أي حاجة من روسيا والصين ودا هيتم اقراره في أقرب فرصة حسب المسؤول الروسي.