البرازيل داخلة بتقلها.. قصة مشروع عالمي للحبوب في اقتصادية قناة السويس
المنطقة الا قتصادية بقناة السويس بتعمل معجزات وفي الكام شهر الأخيرة جاتلها استثمارات محققة بحوالي 1.7 مليار دولار دا غير مليارات تانية تم توقيع اتفاقيات بخصوصها خلال 2023 والمتوقع تكون المنطقة من أهم مناطق الشرق الأوسط صناعيا وخدميا ولوجستيا بحكم قربها من قناة السويس وخطوط التجارة الدولية البرية ولأنها كمان قريبة من الموانيء المصرية العملاقة بالسخنة وبورسعيد والإسكندرية.. ايه اللي بيحصل في اقتصادية قناة السويس وإيه اللي البرازيل ناوية تعمله فيها وإزاي هتخليها منطقة تجذب مستثمرين العالم
لو متعرفش البرازيل دلوقتي من أهم اقتصاديات العالم الكبرى وبتسعى إنها يكون ليها موطن قدم في سوق الاستثمار الدولي وتوسيع نفوذها الاقتصادي على غرار الهند والصين، واختارت مصر كبوابة لاستثماراتها في افريقيا والعالم بحكم الفرص الكبيرة والمتنوعة في السوق المصري وعشان كده استقبل اللواء وليد يوسف، نائب رئيس الهيئة العامة للمنطقة الاقتصادية لقناة السويس للمنطقة الجنوبية، وفد حكومي برازيلي رفيع المستوى برئاسة السفير أليكس جياكوميلي، رئيس قطاع الترويج التجاري والاستثمار والزراعة بالخارجية البرازيلية يعني البرازيل بعتت وفد رسمي من العيار التقيل للمنطقة الاقتصادية اللي سمعت عنها كتير.
لكن الوفد البرازيلي جاي ليه.. شوف حضرتك حسب البيان الرسمي لهيئة المنطقة الاقتصادية استهدف اللقاء التعرف على جهود المنطقة الاقتصادية في مجالات التنمية الخضراء والحلول البيئية، والتعرف كمان على أبرز الحوافز الاستثمارية المباشرة وغير المباشرة داخل المناطق الصناعية والموانئ التابعة، والوفد البرازيلي أتكلم بصراحة وقال إنه البرازيل مهتمة جدا التعاون في مجالات كتير في المنطقة الاقتصادية بعد ماشافوا على الطبيعة موقعها الفريد وامكانياتها الكبيرة ولهث الدول الكبرى زي الصين والهند وروسيا على الاستثمار فيها وإقامة مدن كاملة صناعية واستغلال موقعها الجعرافي واللوجستي.
نائب رئيس المنطقة الاقتصادية استغل الفرص وعرض على الوفد البرازيلي تفاصيل الفرص في المنطقة الاقتصادية ومقوماتها زي الموقع الاستراتيجي اللي خلاها بالقرب من الأسواق الخارجية، وتمتعها باتفاقيات تجارية دولية عديدة من شأنها تسهيل نفاذ البضائع والمنتجات لأسواق متنوعة.
وعرض على الوفد البرازيلي عددٍ من الخدمات اللي بتتيحها المنطقة الاقتصادية للمستثمرين زي خدمات الشباك الواحد لتيسير الإجراءات واستخراج التراخيص في القطاعات كافة، واستعداد المنطقة لفتح الطريق أمام الشركات البرازيلية بالمنطقة في ظل عضوية مصر لمجموعة بريكس اللي تعد البرازيل أحد أعضائها البارزين ومصر هتنضم ليها رسميا خلال أيام.
الوفد البرازيل انبهر حرفيا باللي شافه وسمعه وأكد إنه هيتم دعوة الشركات البرازيلية فورا للاستثمار في المنطقة الاقتصادية خاصة في مجالات متعددة ذات اهتمام مشترك زي مشروعات الطاقة الخضراء ومجال الخدمات اللوجستية، ومش كده وبس دا كمان الوفد البرازيلي أتكلم عن مشروع ضخم ممكن البرازيل تعمله في المنطقة واستغلال امكانياتها اللوجستية وقربها من المواني والمشروع عبارة عن إقامة منطقة لوجستية كاملة وعملاقة لتخزين الحبوب والسكر والزيوت داخل المنطقة الاقتصادية باستثمار شركات برازيلية وطبعا دا مشروع عملاق وبمليارات الدولارات وهينقل المنطقة والاقتصاد المصري في حتة تانية ,., باختصار المشروع هيحول مصر لمركز غالمي لتخزين الحبوب وعلى فكرة مصر وروسيا اتفقوا قبل كده إن المنطقة تكون مركز للحبوب الروسية وإعادة تصديرها للعالم وطبعا دا مشروع عالمي هيوفر على مصر مليارات الدولارات سنويا نظير استخدام موانيها وطرقها وفضلا عن قيمته السياسية الكبيرة.
المشروع البرازيلي حسب الكلام اللي طلع بعد جولة الوفد في المنطقة هيتم العمل عليه مباشرة ودعوة الشركات البرازيلية لزيارة المنطقة وتحديد مكان المشروع وعشان تعرف قد إيه المشروع ضخم .. طبعا هيكون فيه مشروعات صوامع حديثة ومواني وطرق تجارة وتسويق وشحن وتفريغ واتفاقيات ودي فايدة البنية الأساسية اللي مصر عملتها في عهد السيسي واللي خلاها تقدر تعمل أي مشروع في العالم.
