ايه اللى بيحصل فى انستاباي؟.. هل الوضع تحت السيرة؟
فى الساعات الأخيرة تداول عدد من رواد مواقع التواصل الاجتماعي بعض المنشورات حوالين تعطل بعض الخدمات اللى بيقدمها تطبيق إنستا باي التابع للبنك المركزي المصري.. وفيه ناس قالت انها حاولت تشغل التطبيق لكنه مكنش بيستجيب بالصورة المطلوبة.. واللى يقولك دي مشكلة انترنت واللى يقولك لأ ده تحديث بيتعمل فى التطبيق ولا يقولك خلى بالك أحسن بيانتك تتسرق.. فيا تارى ايه اللى بيحصل فى اشهر تطبيق لتحويل الأموال فى مصر؟ وهل فعلا فيه خطورة على أرصدة وحسابات العملاء؟
قبل ما نجاوب على السئلةدي خلينا نحكيلكم الأول حكاية انستاباي .. فى شهر مارس 2022 أطلق البنك المركزي المنظومة الوطنية للمدفوعات اللحظية اللى بتعتبر واحدة من أهم مشروعات البنية التحتية لنظم الدفع اللى يرعاها البنك المركزي المصري وصممت مخصوص عشان تكون بديل للمدفوعات النقدية ولإتاحة كافة خدمات التحويلات للعملاء لحظيا طوال أيام الأسبوع على مدار 24 ساعة.
ومن أهم نتائج المنظومة الوطنية للمدفوعات اللحظية كان اطلاق تطبيق انستاباي وهو تطبيق أطلقه البنك المركزي لتحويل الأموال لحظيًا بشكل إلكتروني من خلال ربط جميع الحسابات البنكية في تطبيق واحد بعد التسجيل في التطبيق وبيتم تحويل أموال الأفراد بشكل لحظي من أي حساب بنكي أو محفظة إلكترونية أو بطاقة ميزة الإلكترونية طول أيام الأسبوع على مدار 24 ساعة من خلال الهاتف المحمول أو عنوان التعريف اللحظي (IPN) أو رقم البطاقة البنكية أو رقم الحساب البنكي.
ووفقا لأحدث أرقام كشف البنك المركزي عن ارتفاع عملاء تطبيق إنستا باي إلى 6.2 مليون عميل ضمن جهوده في تعزيز خدمات الدفع الرقمية في السوق المصرية
وبيقدم انستاباي العديد من الخدمات منها خدمات تحويل الأموال المختلف الحسابات والبطاقات والمحافظ الإلكترونية و الاستعلام عن رصيد الحساب والحصول على كشف حساب مختصر وسداد فواتير (كهرباء - مياه - غاز - تليفون) وشحن رصيد الموبايل.
والسؤال .. هل تطبيق انستاباي آمن ؟
التطبيق آمن تماما بنسبة 100% والشكاوي اللى حصلت فى الساعات الأخيرة كان سببها بعض التحديدثات اللى بتتم على التطبيق لاضافة خدمات جديدة هتعمل ثورة غير طبيعية فى عمليات تحويل الموال والدفع اللحظي.. وانستاباي فى الأيام الجاي هيوسع خدمات وهيخلى فيه فرصة للمصريين فى الخارج انهم يحولوا فلوسهم من خلال التطبيق ومن غير رسوم كمان بالاتفاق مع البنوك المركزية فى الدول الموجود فيها المصريين.
يعني مش ممكن يحصل اختراق وبيانات وأرصدة العملاء تتسرب؟
من المستحيل ده يحصل فى تطبيق انستاباي لأن البنك المركزي بيشرف عليه بنفسه ومطبق اعلى درجات الأمن السيبراني
طب وممكن احول كام من انستاباي؟
فيما يخص حدود المعاملات على تطبيق إنستا باي تقدر تحول 70 ألف جنيه للمعاملة و120 ألف جنيه يوميا و400 ألف جنيه شهريا ولحد دلوقتى التحويلات مجانا بدون ما تدفع ولا مليم لكن هيتم مستقبلا فرض رسوم بسيطة جدا للتحويلات
