اجتماع الحسم.. كواليس لقاء محافظ المركزي مع مدير صندوق النقد الدولي

واضح كده ان المفاوضات بين مصر وصندوق النقد وصلت لمراحل متاقدمة جدا وواضح كمان اننا خلال الأيام الجاية هنسمع أخبار حلوة بخصوص قرض الصندوق ومضاعفة الرقم اللى هتحصل عليه مصر وكمان وضع نهاية لموعد مراجعة برنامج مصر من قبل بعثة الصندوق.. ليه بنقول كده ؟ وايه التطورات اللى حصلت فى الساعات الأخيرة ؟ وهل تم حسم النقاط الخلافية بين الطرفين ؟ 
 

 
فى مدينة دبي وعلى هامش فاعليات مؤتمر المناخ اللى بتستضيفه دولة الامارات العربية المتحدة حصل اجتماع مهم جدا بين حسن عبدالله محافظ البنك المركزي المصري وكريستالينا چورچييڤا، المدير التنفيذي لصندوق النقد الدولي.. وده بعد اللقاء الأهم اللى تم من 3 ايام بين الرئيس السيسي ومديرة الصندوق لبحث الملفات المشتركة بين الحكومة المصرية ومسئولى الصندوق.
ووفقا لبعض التسريبات اللى خرجت من لقاء محافظ المركزي مع جورجيفيا فخلال اللقاء تم استعراض ما حققه الاقتصاد المصري من إنجازات على الرغم من التحديات الإقليمية والعالمية وكمان جهود الدولة في تعظيم دور القطاع الخاص في التنمية ومواصلة تعزيز الإصلاحات الهيكلية المتعلقة بالسياسات المالية والنقدية 
وفى لقائها مع حسن عبدالله أشادت المدير التنفيذي لصندوق النقد الدولي بدور البنك المركزي المصري في إدارة ملف السياسة النقدية خلال الفترة الاستثنائية الحالية وقالت انها بتتوقع رفع حجم قرض الصندوق لمصر بسبب العبء الإضافي وتأثير الأحداث والأزمات الخارجية المحيطة.. وأكدت على مرونة الاقتصاد المصري في مواجهة الأزمات الإقليمية والعالمية وحرص الصندوق على مواصلة علاقات التعاون المتميزة مع مصر.
طب الكلام ده معناه ايه ؟
اللى حصل فى اجتماع النهاردة وكلام مديرة صندوق النقد مالوش غير معنى واضح ان الخلافات اللى كانت موجودة قبل كده بين الحكومة المصرية وبين مسئولي الصندوق انتهت تماما وتحديدا الخلاف حوالين مرونة سعر الصرف وتسريع ملف الطروحات الحكومية بل ان مديرة صندوق النقد نفسها اعلنت فى تصريحات سابقة ليها فى الايام اللى فاتت ان تحرير سعر الصرف مش اولوية خالص دلوقتى وان الأهم مساعدة مصر على مواجهة التضخم.
وخلال أيام وربما ساعات ممكن يصدر قرار رفع البرنامج التمويلي اللى بيقدموا الصندوق لمصر من 3 الى 5 او 6 مليار دولار وده تحول جذري فى العلاقة بين مصر وصندوق النقد الدولي لأن كان فيه خلافات قوية حوالين بعض الملفات والخلافات دي أجلت وصول بعثة الصندوق مصر لمراجعة البرنامج التمويلي المتفق عليه