ليلة سقوط حيتان العملة.. التجار جمدوا نشاطهم بعد موقعة الشروق

ايه اللي بيحصل في السوق السودا للدولار وليه حيتان العملة وقفوا نشاطهم وإيه اللي حصل في الشروق وقصة شبكات العملة اللي بتوقع واحدة ورا التانية
 

من يوم الأربع اللي فات والسوق السودا للدولار بتزف واسعارها بتنزل بشكل كبير جدا ووصلت لـ 9 جنيه في أيام قليلة ولسه النزول مستمر ويظهر كده إن السوق الموازية بتلفظ أنفاسها الأخيرة.. طيب اللي حصل.
على مدار الأيام اللي فاتت الدولة كشفت عن اخبار كويسة ومفرحة بخصوص سيولة الدولار في السوق المصرفي وتوفره للمستوردين وانهاء أزمات الافراجات الجمركية وفي نفس الوقت تجديد 5 ودايع لدول خليجية في البنك المركزي المصري يعني تأجيل تسديدها ودا خفف من عبء الديون الخارجية بشكل كبير ودي كلها ضربات للسوق الموازية لكن الضربة الأكبر كانت من صندوق النقد الدولي واللي أعلن عن دعم كبير لمصر في القريب العاجل وحل أزمة القرض تقريبا وكمان مضاعفته لـ6 مليار دولار ودا اللي خلي السوق السودا شبه تنهار.

على الجانب التاني الدولة بتتحرك بقوة لملاحقة مافيا العملة وحيتان الدولار وفي الساعات الأخيرة شنت حملات كبيرة على مستوى الجمهورية لاستهداف تجار العملة والأخبار دي زلزلت السوق السودا وعدد كبير من التجار قرروا تجميد نشاطهم لأن سقوطهم يعني خسارة ومصادرة كل اللي جمعوه من التجارة الغير مشروعة.

وفيه حاجة حصلت في مدينة الشروق بالقاهرة خلت تجار العملة يلفوا حولين نفسهم وهي سقوط واحد من حيتان الجملة بعد ما كان في طريقه عشان يعمل صفقة كبيرة واتمسك ومعاه 24 مليون جنيه مرة واحدة ودا غير المبالغ اللي مخبيها من حصيلة العملة واللي هتكون أضعاف المبلغ دا.
التاجر اعترف إنه فعلا بيتاجر في العملة وتحديدا الدولار عن طريق تحويل الأموال بطرق غير مشروعة من وإلى البلاد وبعيد عن السوق المصرفي بما يعرف بنظام المقاصة ودا مقابل نسبة متفق عليها من راغبي التحويل وإن المبالغ المالية المضبوطة بحوزته متحصله من تجارته غير المشروعة، وكشف عن شبكة تانية في تجارة العملة بيتعامل معاها.
لكن الأهم في اعتراافات التاجر إنه كشف طريقة التداول السرية في سوق العملة وهي بتكون عن طريق شبكات ومجموعات بتضم البايع والمشتري والوسطاء وإن الموضوع داخل فيه شركات ورجال أعمال وإن كل شبكة متصلة ببعض زي حبات السبحة ودي المعلومة اللي لعبت عليها الأجهزة المختصة وعرفت إن سقوط شبكة يعني سقوط شبكات كتير ودا سبب الرعب في سوق العملة الغير شرعية.

طبعا سقوط شبكات العملة أكبر ضربة للسوق السودا للدولار واللي بتتأثر بسرعة البرق بأي خطر عليها والتجار قرروا يهدو اللعب عشان مايوقعوش.