فلوسك هاتزيد وقرشك مش هايفارقك لو عرفت الكلمتين دول عن الاستثمار في الذهب

إحنا النهاردة هانقولك الخلاصة.. عن الاستثمار في الذهب.. امتى تشتري وامتى تبيع؟ وأية النوع الأفضل لشراء الذهب.. وامتى ماتبيعش نهائي.

بنقولها تاني. وتالت ورابع.. الوقت الحالي مناسب للشراء.. قصدنا على اليومين دول يعني.. ااااه قصدنا اليومين 
دول.

ودا علشان كل المؤشرات والتوقعات والتحليلات بتقول إن أسعار الذهب هاترتفع في الأسواق.. كنتيجة للاضطرابات السياسية والاقتصادية بفعل الأحداث في منطقة الشرق الأوسط.

وقولنا قبل كدا إن لما يكون في قلق أو حتى لو مافيش عامة فالذهب هو الوسيلة الأولى للاستثمار اللي بتلجأ ليها الناس وعلشان كدا هاتلاقي الناس في متابعة مستمرة لأسعار الذهب.

والأفضل هو عدم التعامل مع الذهب بعقلية المضاربة أو الرغبة في الحصول على مكسب سريع خاصة وإن الذهب من الاستثمارات اللي بتجيب عوائد

نرجع لمرجوعنا.. أنت دلوقتي سمعتني لما قولت إن الوقت الحالي مناسب لشراء الذهب.. السؤال اللي مفروض يتساءل بقى.. نشتري اية بالظبط لو عايزين نضمن قرش زيادة أو نحط قرش على القرش.

بص يا فندم.. هاني ميلاد، رئيس شعبة الذهب بغرفة القاهرة التجارية، قال في تصريحات صحفية إن في أشكال كثيرة للذهب واللي يمكن اقتناؤها بغرض الاستثمار كالسبائك والجنيهات الذهب والمشغولات الذهبية، ومسألة شراء أي منها تأكد أنه هايحقق لمقتنيها عائد وربح، لكن باختلاف فروق المصنعية.

لكن الافضل اية

الأفضل هو أنك لو هاتشتري ذهب من أجل الاستثمار بس فخليك في الجنيهات والسبائك ، أما لو كان الشراء بغرض الجمع بين حفظ قيمة الأموال والزينة فالمشغولات الذهبية أفضل لأنه يمكن ارتداؤها والاستفادة منها.

وكمان لازم تعرف إن  السبائك والجنيهات الذهب بينضاف ليها نفس المصنعية تقريبا، لكن باختلاف الأوزان والأعيرة، يعني الجنيه الذهب بيبدأ من ربع جنيه يعني من 2 جرام حتى جنيه ذهب وزنه 8 جرامات، ويكون الجنيه الذهب عيار 21.

وكمان السبائك بتتميز بأوزان مختلفة تناسب كل العملاء، تبدأ من وزن ربع جرام حتى كيلو جرام، لكنها تكون من الذهب عيار ٢٤.

شوف الأنسب ليك واختار.. وخلي بالك الذهب سعره هايزيد