محمد صلاح وعائلته.. استثمارات بالملايين.. وعمره ما بخل على أهل بلده
محمد صلاح بيستثمر فلوسه في اية،ثروة صلاح كام.. وهل استثماراته برة مصر بس ولا جوه كمان..محمد صلاح بيعمل أعمال خيرية ولا لأ
بنعتبره رمز للعزيمة والإصرار والرغبة في إثبات الذات
جابها من قرية نجريج في الغربية وبقى أشهر لاعب في العالم.. النهاردة هانتكلم عن موووو صلاح.. واللي كل قرش عمله فهو نتاج مجهود وعزيمة غير طبيعية.
محمد صلاح لاعب نادي ليفربول وملك إنجلترا المتوج.. كون ثروته بالحلال وبيصرف منها على أهله وناسه.
ثروته.. زي ما قالت صحيفة “ميرور” البريطانية.. تقدر بنحو 75 مليون جنيه إسترليني، ودا يعتبر آخر تقدير لثروة اللاعب المصري واللي تم الإعلان عنه من سنتين.
كمان صلاح رصيده في أحد البنوك بتقدر بنحو 20 مليون و182 ألف جنيه إسترليني، على فكرة دا حساب واحد.. لكن أبو صلاح ربنا يزيده عنده حسابات تانية كتير.
طيب يا ترى بقى ابو مكة مشغل فلوسه في اية بالظبط.. ويا ترى كلها برة مصر ولا جوه مصر.
خلونا نقول لحضراتكم إن محمد صلاح.. بدأ يمشي على نفس خطى نجوم الكرة الكبار وعلى رأسهم كريستيانو رونالدو اللي عنده العديد من الاستثمارات أبرزها في مجال الفنادق والسياحة.
صحيفة ديلي ستار البريطانية، قالت إن محمد صلاح بدأ مشروعه جديد.. وبالفعل أسس شركته الخاصة في استثمارات مواد البناء ودا كان في عام ٢٠٢١.
والشركة دي ليها فرعين بمجال الاستثمار العقاري ومجال الاستثمار في الطوب وأدوات البناء وهي تعتبر أحدث مشاريع النجم المصري في بريطانيا.
وكمان صلاح عنده شركة اسمها "Salah UK Commercial".. ودي شركة تجارية وليها فرعين في انجلترا .. وبتقدر أصولها بـ9 ملايين جنيه.. وكمان ليها فرع تاني بقيمة أصول تبلغ 2 مليون جنيه استرليني وبرضوا في نفس التخصص.
وفي مصر.. محمد صلاح كان في مقابلة تليفزيونية مع عمرو أديب وأكد أنه عنده نيه يعمل استثمارات تحمل اسمه “في مصر... وزي ما صرح فالمشروع هايتضمن صالة ألعاب رياضية وجيم كبير أو أكثر، ومطعم للأكل الصحي.
الفكرة أن المشروع صلاح ناوي يعمل المشروع دا.. علشان يأهل الشباب بشكل صحي منضبط.. وهو قال كدا بنفسه في المقابلة.. وأنه مابيسعاش أن يكون المشروع دا مجرد سبوبة .. بل مجال لاكتشاف المواهب اللي بتحتاج فقط للنصيحة، وأشخاص بحاجة لأن يضعها أحد على الطريق الصح
صلاح بيعمل مشاريع في استثمارات برة وداخل مصر.. وكمان عمره ما بخل على أهله وناسه.. اللي دايما بيقدم ليهم الدعم المادي بكافة أنواعه وأشكاله.
على سبيل المثال.. تبرعه بـ5 ملايين جنيه لصندوق تحيا مصر ودا للمساهمة فى تنفيذ مشروعات خيرية لخدمة الفقراء والمحتاجين.
كمان صلاح كان تبرع بتكاليف شراء جهاز "إيكو" لمركز روماتيزم القلب ببسيون، ودا لخدمة ابناء قريته ومركز بسيون فى الكشف المبكر عن مرض روماتيزم القلب.
صلاح إبن الأصول والناس الطيبة.. كمان كان أعلن عن إنشاء جمعية خيرية لرعاية الأيتام والأسر الفقيرة بنجريج مسقط رأسه بمحافظة الغربية، والجمعية دلوقتي بتقوم بأنشطة مكثفة لدعم الأسر.
دا غير تبرع صلاح بنفقات إنشاء المعهد الأزهرى.. والمعهد دا ابتدائى وإعدادى وثانوى على قطعة أرض مساحتها 1575 متر 2 لخدمة فتيات القرية.. ودا لتخفيف العبء عنهم وعن أسرهم علشان ماينتقلوش للقرى المجاورة.
صلاح الإنسان.. عطاء بلا حدود ودا يظهر كمان في تبرعه بشراء حضانتين لمستشفى بسيون المركزى لخدمة الأطفال وتخفيفا على أبناء قريته من السفر 50 كيلو لمدينة طنطا للمستشفيات.
نقدر نقول إن محمد صلاح هو سفير للإنسانية.. ودا بيتجسد في كل المشاريع اللي بيقدمه لأهل بلده.. ربنا يوفقك ويكرمك يا صلاح.
