الدهب رايح على فين؟ حاجة هتحصل يوم الاربعاء هتقلب الأوضاع

يا ترى أسعار الدهب رايحة على فين؟ هتستمر في التراجع ولا هترجع تزيد من تاني؟ وايه اللى هيحصل يوم الأربع ممكن يقلب الموازين في سوق الدهب؟ وليه الأسعار عالميا بتنخفض وعندنا مستقرة؟ وهل الأفضل تشتري دهب حاليا ولا تبيع؟ 
 
يوم التلات والاربع الجايين هيعقد الاحتياطي الفيدرالي الأمريكي اجتماع مهم جدا للنظر في أسعار الفايدة الأمريكية بناء على البيانات والتقارير الخاصة بمعدلات التضخم ومؤشر البطالة في الولايات المتحدة الأمريكية.. 
ووفقا لكتير من تقارير مؤسسات التمويل ومراكز الأبحاث فالفيدرالي بنسبة كبيرة هيثبت أسعار الفايدة في الاجتماع الجاي وده اللى قاله بنك جولدمان ساكس في مذكرة ليه أكد من خلالها توقف الفيدرالي الأمريكي عن رفع أسعار الفائدة في اجتماع سبتمبر بسبب التحسن في سوق العمل والأرقام الإيجابية في شأن معدلات التضخم وتوقعات النمو للربع الأخير من العام وقالوا ان ده هيؤدي إلى إقناع أعضاء لجنة السوق المفتوحة بإمكانية تجاوز رفع الفائدة مرة تانية قبل نهاية 2023".

لكن في نفس الوقت بيرى كتير من المحللين والخبراء أن البنك المركزي الأمريكي هيخلى الباب مفتوح لرفع سعر الفائدة بربع نقطة مئوية مرة أخيرة قبل نهاية العام في نوفمبر أو ديسمبر.
طب ايه علاقة اللى هيحصل في اجتماع الفيدرالي بأسعار الدهب؟ 
فيه علاقة وثيقة جدا بين أسعار الفايدة وأسعار الدهب وعادة في الظروف الطبيعية رفع أسعار الفايدة بيؤدي الى انخفاض أسعار الدهب لأن المستثمرين بيروحوا للاسستثمار في أدوات الدين الحكومية لأنها بتحقق أرباح أعلى بكتير من الدهب والعكس صحيح خفض أسعار الفايدة المفروض يرفع أسعار الدهب

حد هيسأل طب وبالنسبة لتثبيت سعر الفايدة على الدولار هيعمل ايه في الدهب؟ 
ده هيخلى أسعار الدهب تهدا وبنسبة كبيرة مش هيكون فيه ارتفاع كبير في سعر المعدن النفيس من دلوقتى ولحد نوفمبر الجاى ده بالنسبة لأسعار الدهب عالميا واللى متابع هيعرف ان أسعار الذهب أغلقت على تراجع عند مستوى 1924 دولار أمريكي للأونصة في نهاية تداولات الأسبوع اللى فات.

طب اشمعنا الدهب عالميا بينخفض وعندنا يا اما يزيد يا ما يستقر؟ 
سوق الدهب في مصر من بعد الحرب الروسية الأوكرانية بقا ليه وضع خاص بسبب أزمة نقص العملة وتقدر تقول كده ان تسعير الدهب في مصر مالوش علاقة بسعره العالمي وانما مربوط بسعر الدولار في السوق السودا وعشان كدا لو لاحظت هتقي ان فيه فجوة سعرية بين السعر المحلى والسعر العالمي وصلت لأكتر من 700 جنيه في الجرام الواحد في بعض الأوقات 
ايوه يعنى الأفضل حاليا بيع الدهب ولا الشرا؟ 
ما اقدرش اجاوب بشكل مباشر على السؤال ده لأن قرار البيع والشر يخص كل واحد وكل واحد يحسب حسبته ويختار الاستثمار الأفضل لكن المؤكد ان أسعار الدهب مش هترفع قريب ولو معاك مبلغ ومش محتاجه لفترة طويلة سنة على الأقل فالدهب استثمار مضمون ومربح لكنه استثمار طويل الجل وتقدر تحسب أسعار الدهب زادت كام في السنين الأخيرة ووقتها تعرف تختار هل تشترى ولا تبيع