سر الحملة الغامضة على مصر من منصات صديقة.. مال الخليج ماله
على مدار التاريخ العلاقة بين مصر ودول الخليج كانت علاقة اخوية ومساندة وحماية ودعم وما ماينفيش انغفي اوقات كانت العلاقات مش في أحسن احوالها ودي طبيعي جدا في العالم السياسي لكن ماحصلش ابدا في أي وقت من الأوقات إن مصر كانت خطر على الخليج أو العكس ولا عمر طرف كان ممكن يكون مصدر تهديد لبناني بالعكس في الشدة مصر عمرها ما سابت الخليج ولا دول الخليج تخلت عن القاهرة في وقت أزماتها الكبيرة.. ايه اللي جد وليه نبرة الهجوم على مصر زادت من منصات خليجية وأشخاص وسياسيين سابقين وليه المنصات دي مركزة اووي على المسألة الاقتصادية وعلى الدولار وليه حكاية نبرة الفلوس الخليجية في مصر.
زي ما قلنا مصر طول عمرها ضهر للخليج وحائط الصد القوي ضد الأطماع والمخاطر اللي كانت دول الخليج بتتعرضها بسبب ثرواتها الضخمة زي ما حصل مع إيران ودول تانية وكلنا فاكرين ازاي مصر وقفت بقوة قصاد محاولات نهب ثروات الخليج وتهديد استقلال دوله وكلنا فاكرين تهديدات الرئيس السابق حسني مبارك لإيران لما فكرت بس تهدد الخليج وكلنا فاكرين عبارة مسافة السكة لما الرئيس السيسي اتسأل على موقف مصر حال تعرض الخليج للتهديد المباشر ومعني العبارة إن مصر كلها بجيشها وشعبها هتهب لنجدة خواتها في الخليج وهنا مش مجال نفكركم بفضل مصر ع العرب ولا بجمايل العرب على مصر لكن لما الأمور تاخد اتجاه غامض وعكسي يبقي فيه حاجة غلط.
الحاجة الغلط اللي اتكلمنا عليها هي اصوات خليجية أغلبها من الكويت وجت على لسان إعلاميين وساسة سابقين والغريب إن الموضوع خد شبه حملة ضد مصر لدرجة إن الحملة المضادة خدت اتجاه كوميدي وتصريحات تطير العقل لبعدها الكبير عن الواقع يعني فيه سياسي كويتي طلع في فيديو وانتقد مطالب بمساعدة مصر وقال حاجة غريبة جدا وهي أن مصر اللي عاوزين يساعدوها عندها 100 مليون طن دهب في جبل السكري تخيل حضرتك الرقم واللي كل الدهب في بنوك العالم وفي البيوت ما يجبش ربع الرقم دا ودا بيخلينا نفهم العقليات اللي بتهاجم مصر ونفس الشخصية دي قالت إن الحكومة المصرية عندها 197 مليار دولار في البنوك الأجنبية وكمان نسب الكلام لسفيرة أمريكية وطبعا الست ولا عمرها اتكلمت، ورجع وقال مصر اكتشفت غاز ب100 مليار دولار في حقل نرجس، طبعا من أرقام السياسي الكويتي بيتضح سلامة قواه العقلية وكنت نتمنى تكوموعندها الأرقام دي لكن اللي يهمنا إن حديث السياسي دا جي في إطار التحريض على مصر والمطالبة لعدم مساعدتها في أزمتها الحالية.
وبنظرة على التعليقات اللي ردت على الفيديو الراجل الكويتي ناس اتكلمت عن مصر وفضلها على الكويت وفيه ناس خدت ناحية مهاجمة مصر ومعايرتها بالفقر وأنها دولة كلها فساد ومش لازم الكويت تساعدها.
بالتزامن ظهرت حملة مشابهة في منصات التواصل الاجتماعي في السعودية وأغلبها كان لجمهور اتحاد جدة السعودي بسبب رفض محمد صلاح نجم مصر وليفربول الانضمام للفريق السعودي واعتبروا تصرفه استكبار وغرور رغم إن دي حرية شخصية لاتقلل من الفريق ولا الجمهور السعودي لكن الحملة ضد صلاح زادت حدتها فجأة واتحولت لبلده مصر وبدأت نبرة وبوستات وتويتات إهانة لأكبر بلد عربي ومعايرة بالمال الخليج في البنك المركزي المصري وبعدها دخلت على الخط لجان إلكترونية من الجماعة إياها تغذي نبرة الهجوم على مصر وكان محاورها الأزمة الاقتصادية وأزمة الدولار.
طبعا لان دي حملات من ظاهرها لجمهور عادي او شخصيات سياسية سابقة أو رياضية لكن في سياقها نبرة وكلام لازم يترد عليه وأول الرد إن مصر عمرها ما كانت دولة متسولة ولا بتمد أيدها ودعم الخليج مشكورا لمصر بعد أحداث 2011 كان جزء كبير منه خوف الخليج نفسه من انهيار مصر وجيشها ودا هيخليها عارية أمام الأطماع الإيرانية وغيرها تاني رد إن الأموال الخليجية في مصر جزء كبير منها داخل في الديون وبيدفع اقساطه وتالت حاجة إن الاستثمارات الخليجية في مصر المستثمر بيكسب من وراها زي ما بيكسب في بلد تانية ومش منحة ولا هدية دا غير إن الاستثمارات الخليجية في مصر لا تقارن بالاستثمارات الخليجية الضخمة في أمريكا والصين والهند وباكستان وتركيا والرد الأخير إن مصر كانت سباقة في مساعدات دول الخليج قبل نهضة النفط وقبل شعوبها ماتعرف طريق الثروات والتريليونات وصناديق الاستثمار السيادية وقدمت كل حاجة تقريباً للشعوب والدول الخليجية وعمرها ما عايرت الخليجيين.
