قناة السويس راجعة بقوة.. والإيرادات بتسجل قفزة كبيرة خلال شهر أكتوبر

إيرادات القناة حققت زيادة بنسبة 94% مقارنة بنفس الشهر السنة اللي فاتت، ووصلت لـ724 مليون دولار، بالتزامن مع ارتفاع حركة السفن العابرة بنسبة 65%.

والأرقام الإيجابية دي دفعت الفريق أسامة ربيع، رئيس هيئة قناة السويس، لرفع مستهدف الإيرادات خلال 2026 إلى 6.6 مليار دولار، بدلًا من 6.2 مليار.

والطموح مش واقف عند كده.. الهيئة بتستهدف الوصول لـ7.6 مليار دولار في 2027، و10.3 مليار في 2029، لحد ما توصل لـ12 مليار دولار بنهاية 2030.

لكن رغم التحسن، لسه فيه تحديات.. فمتوسط عبور السفن يوميًا بيدور حوالين 35 سفينة، مقابل 70 لـ80 سفينة قبل أزمة البحر الأحمر.

والهيئة بتحاول تشجع الخطوط الملاحية بحوافز وتخفيضات وصلت من 45% لـ75%، في انتظار عودة حركة الملاحة لمعدلاتها الطبيعية.