فلوسك هاتروح عليك.. اتجنب "الغلطة" لما تيجي تعمل تحويل لأي شخص
الخميس 10/أغسطس/2023 - 01:19 ص
ممكن تيجي تحول فلوس لشخص ما وتلاقي الفلوس دي راحت لشخص تاني خالص.. وقتها طبعًا أنت لازم تتواصل مع اللي اتحوله فلوس بالغلط علشان ترجع الفلوس.
في الحالة دي بقى أنت لازم تروح فرع البنك.. وتطلب من الموظف أنهم يتواصلوا مع العميل اللي اتحوله فلوس بالغلط.. وهما هايكلموا العميل وهايحاولوا يرجعوا الفلوس.. وهو وضميره بقى. يا يرجع الفلوس يا عليك العوض فيهم.
والموضوع دا ممكن يحصل برضوا لو استخدمت تطبيق "انستباي".. واللي لو حولت فيه فلوس بالغلط تقدر تدخل على خانة طلب دفع وتكتب في الملاحظات أنك حولت فلوس بالغلط على الحساب الفلاني.. وبرضوا اللي اتحوله الفلوس يا يعامل ضميره ويحول الفلوس يا يحصل العكس.
الأفضل.. أنك تحول مبلغ صغير في الأول للشخص اللي أنت عايز تحوله الفلوس علشان تتأكد وبعد كدا تحول المبلغ كامل.
