ليه الحكومة وقفت تصدير الغاز وايه اللي بيحصل في القطاع

ليه مصر وقفت تصدير الغاز وايه اللي بيحصل في قطاع الغاز وايه الإشاعات اللي بتتقال كل شوية وتأثير دا على توفير الدولار في السوق المصري.
 
الحكومة قررت وقف صادرات الغاز المسال، ودا لظرف طاريء خاص بالاسعار الفورية للغاز واللي نزلت بشكل كبير وكمان محاولة لتلبية الطلب المحلي الكبير من الغاز المستعمل في توليد الكهرباء، والحد من أزمة انقطاع التيار الكهربائي  لان ارتفاع الاحمال للدرجة القصوى بيستدعى ضخ كمية ضخمة للغاز في شبكات الوقود للمحطات عشان تشتغل يعني الحكومة خلت الأولوية لقطاع الكهرباء في مصر على التصدير للخارج

وزير البترول طارق الملا حسم موضوع تصدير الغاز وطلع وأكد  إنه هيتم استئناف صادرات الغاز المسال خلال شهر أكتوبر الي جاي وإن الإيرادات هتنخفض بنسبة 50% خلال العام الجاري.

وبحسب تقرير حديث لشركة "إنرجي أوتلوك أدفايزرز"  الميزان التجاري للغاز في مصر هيواجه ضغوط كبيرة في ظل انخفاض أسعار الغاز الفورية وارتفاع الطلب المحلي وأضاف التقرير إن فيه احتمالات كبيرة لتعرض القارة الأوروبية كلها لأزمة طاقة خلال العامين الجاري والمقبل، لأسباب عديدة، من بينها انخفاض صادرات الغاز المسال.
وأكد التقرير إن مصر  هتفضل أبرز المنتجين والمصدرين الرئيسين في منطقة شرق المتوسط، وسوق مهمة لتزويد أوروبا بشحنات إضافية من الغاز المسال رغم الأزمة الحالية في التصدير.

و قفزت صادرات الغاز المسال المصرية لمستويات قياسية، لتصل إلى 7.4 مليون طن في عام 2022، بزيادة 12.1% على أساس سنوي، وكل الخبراء بياكدوا إن قطاع الغاز الطبيعي المصري مفيهوش مشكلة في الانتاج لكن فيه توجيه الاستهلاك واللي راح أغلبه لصالح محطات الكهرباء بسبب الضغوط الغير مسبوقة على التيار بفعل درجات الحرارة المرتفعة.
طبعا عدم تصدير الغاز معناه مفيش دولار جاي من القطاع في الفترة اللي وقف فيها وأكيد هيأثر في المعروض من العمبة الصعبة في السوق الرسمية وعشان نعرف قد إيه قطاع الغاز مهم جدا في خزينة الدولة مصر صدرت من الغاز 8.4 مليار دولار في 2022 مقارنة بـ3.5 مليار دولار خلال عام 2021، بنسبة زيادة 140%، بسبب زيادة أسعار تصدير الغاز المسال عالميًا.