الفيدرالي يصدم الأسواق بقرار غير متوقع.. الأسعار هتولع نار

 
العالم كله حرفيا قاعد دلوقتى ومستني يشوف بنك الاحتياط الفيدرالي الأمريكي هيعمل ايه فى اسعار الفايدة الفترة الجاية وهل هيستمر فى تشديد السياسة النقدية لمواجهة التضخم ولا هيخفف شوية عشان يرفع الضغط من على الاقتصاد ويمنع انهيار البنوك زي ما حصل فى أكتر بنك أمريكي مؤخرا.
التسريبات اللى طالعة من اجتماع بنك الاحتياط الفيدرالي بتقول ان المسئولين هيستمروا فى تشديد سياستهم النقدية لكن بوتيرة اظقل شوية من اللى كان بيحصل قبل كده يعنى فيه رفع تانى لأسعار الفايدة على الدولار لكن مش هيكون بالنسب الكبيرة اللى كانت بتحصل قبل كده .
وفيه خلاف بين أعضاء الفيدرالي حاليا حوالين عدد مرات رفع سعر الفايدة ففي حين ان الغالبية العظمى من الأعضاء شايفة ان الرفع يكون مرة واحدة فيه فريق تانى بيقول مش أقل من مرتين لغاية نهاية 2023. 
وفي تصريحات أمام الكونجرس مؤخرا أكد رئيس مجلس الاحتياطي الفيدرالي جيروم باول إن البنك المركزي قدامه طريق طويل لقطعه لإعادة التضخم إلى هدف الاحتياطي الفيدرالي البالغ 2%.

ولحد دلوقتى وصل حجم الزيادة فى الفايدة على العملة الأمريكية 5% ودي أكبر زيادة حصلت من بداية فترة التمانينات وعشان كده فيه تفكير قوي جدا فى الولايات المتحدة الأمريكية دلوقتي لوقف جنون اسعار الفايدة ومنح الاقتصاد فرصة عشان ياخد نفسه وده بسبب التخوف من الدخول فى ركود تضخمي ممكن يقضي على الأخضر واليابس لأن الركود التضخمي معناه توقف حركة البيع والشراء يعنى السلع هتبقا موجودة بس اسعارها عالية جدا وبالتالى لا حد هيبيع ولا حد هيشترى وده ممكن حرفيا يدمر أى اقتصاد لأن معنى كده توقف الانتاج.
والاستمرار فى رفع اسعار الفايدة هيكون ليه تداعيات خطيرة على الأسواق وأسعار السلع هتواصل الارتفاع خصوصا فى ظل أزمة قلة المواد الخام وطبعا الاسواق الناشئة زي مصر وغيرها من الدول بتكون الأكتر عرضة للتأثير بقرارات رفع الفايدة الامريكية لأن خدمة الديون بتزيد وكمان فاتورة الاستيراد لأن كل رفع لفايدة معناه قوة أكتر للدولار.