النهاردة يوم تاريخي في مصر.. بداية النهاية للدولار
أزمة الدولار هتبقى ذكري.. دي جملة الرئيس السيسي اللي قالها على الهواء مباشرة في عز أزمة الدولار وساعتها الناس استغربت إزاي هتبقى ذكري وإيه اللي الرئيس يعرفه والشعب مايعرفهوش.. النهاردة حصلت حاجة غريبة هتخلي الدولار ذكري وإن الجنيه هو اللي جاي ودي أرقام واضحة وصريحة ومش مجرد كلام.. ايه اللي حصل ياترى وإيه دلالته.
مصر عشان تنتهي أزمة الدولار كان لازم توفره ويبقى الموضوع اتحل لأن اللي خلق المشكلة نقص الدولار في السوق ولأسباب كتير كلكم عارفينها لكن الدولة مشتغلتش على الأزمة لكن اشتغلت على حلول الأزمة ولأن الرئيس هو اللي واضع الخطط كان عارف بيقول إيه لما قال ازمة الدولار هتبقى ذكري.
موارد الدولار في مصر معروفة وعلى رأسها قناة السويس واللي الهاردة حققت معجزة في الإيرادات واللي قربت على 10 مليار دولار في العام المالي الحالي ودا اللي أعلنه الفريق أسامة ربيع رئيس هيئة قناة السويس النهاردة واتكلم عن حاجات كتير كلها بتأكد إن الأرقام دي هتضاعف في السنين الجاية.
عشان نعرف القناة اطورت إزاي والايرادات راحت فين.. سنة 2019 القناة جابت 5.7 مليار دولار وفي سنة 2017 وصلت الايردات 5 مليار دولار والنهاردة وصلت 9.4 مليار دولار وأكيد كلنا شفنا الفرق وتقريبا الضعف والأرقام دي وسط أزمة عالمية، وعشان تعرف إن عندك مورد مالي عالمي الدنيا كلها بتحسدك عليه خلونا مع الأرقام وحسب إحصائيات الملاحة بالقناة السنة دي فسجلت أرقام قياسية جديدة وغير مسبوقة على مدار تاريخ القناة، فمثلا حققت أعلى معدل للعبور ب25887 سفينة، وأعلى حمولة صافية سنوية لعام مالي قدرها 1.5 مليار طن، وأعلى إيراد سنوي مالي بلغ 9.4 مليار دولار.
والفريق ربيع كشف مفاجأة إنه بعد الانتهاء من أعمال تطوير القطاع الجنوبي الصخري القناة هتروح في حتة تانية، وعشان نعرف قيمة الايراد السنة دي فهو قد قرض صندوق النقد 3 مرات وأكتر شوية ودي في سنة واحدة حضراتكم، ولو طرحنا 9.4 مليار دولار ايراد 2023 من 7.9 مليار إيرادات السنة اللي فاتت 2022 هيطلع الفرق حوالي مليار و300 مليون دولار زيادة.. فعلا عظيمة يامصر وكل يوم بتكبر.
نرجع للدولار للي هيبقى ذكري زي ما قال الرئيس.. دا اللي حققته قناة السويس نهاردة وهي قطاع واحد من قطاعات كتير بدخل دولارات للبلد وكلها بتعيش طفرة والأرقام هي اللي بتعلن عن نفسها سواء في القناة أو السياحة أو تحويلات المصريين أو التصدير والاستثمار المباشر ومع برامج الجكومة التانية مصر هتردم الدولار.
