الوديعة ولا صناديق استثمار.. أيهما أفضل لنمو مدخراتك؟

ناس كتير بتقع فى حيرة كبيرة جدًا بين الودائع وصناديق الاستثمار، وبتكون ماتعرفش اية الفرق بينهم واية اللى يقدر يفيدهم اكتر..

 وعلشان احنا هنا فى بانكير هدفنا نوضح للعملاء الفرق بين أغلب المنتجات البنكية ونبسط أصعب المصطلحات هانشرح اية الفرق بين الاتنين

والوديعة وبكل بساطة عبارة عن فلوس أنت بتديها للبنك، والبنك بيقوم باستثمارها وبتاخد عليها عائد، وبتكون مدتها أقل من الشهادة واللى بتكون فى الغالب مابتزيدش عن سنة وفى بعض البنوك سنتين.. بس الغالب أنها بتكون مدتها اسبوع أو وديعة مدتها شهر يا إما وديعة مدتها 6 شهور أوسنة.

وبالنسبة للودائع فى البنوك فالعائد بيتحدد حسب نسبة الفايدة اللى بيحددها البنك وبتقدر تستفيد من النسبة دي فى فترات قريبة علشان مدة الودائع مش طويلة.

نيجي بقى لصناديق الاستثمار، وصناديق الاستثمار بكل بساطة عبارة عن استثمار فلوس بيتم تجميعها من عدد من الحسابات البنكية، والبنك بيعين مدير صندوق وبيبدأ فى استثمارها، واللى بيتم استثمارها فى أذون خزانة أو شهادات أو ودائع.

وعائد الصناديق بتتباين ما بين 9.5% أو 10.5%، واللى بتكون أعلى من الوديعة، وتقدر تبيع وثيقة الاستثمار بسعر اليوم، يعني مابتخسرش أى حاجة، ولازم تكون عارف أن فى بعض الصناديق ماينفعش تفكها فى أى وقت لازم يكون أول يوم فى الشهر، وبعد ما وضحلك الفرق وازاى تستفيد من الاتنين تقدر دلوقتي تقرر براحتك.