صفقة مع بولندا ومفاوضات مع روسيا وأوكرانيا.. خريطة قمح مصر بتترسم من جديد
ليه مصر بتدور على القمح في بولندا؟.. وإيه اللي يخلي أكبر مستورد قمح في العالم يغير خريطة مشترياته؟.. وهل رغيف العيش المدعم اللي بياكله عشرات الملايين كل يوم ممكن يتأثر؟
لمشاهدة الفيديو من هنا
مصر وافقت الشهر اللي فات على شراء حوالي ٢٠٠ ألف طن قمح من بولندا.. من شركة إليفار المدعومة من الدولة البولندية.. والشحنات الأولى هتكون بضع مئات الآلاف من الأطنان.. والكميات هتزيد مع الوقت.. وفيه محادثات شغالة على كميات إضافية.
بس الموضوع أكبر من بولندا.. جهاز مستقبل مصر اللي بيشتري الحبوب للحكومة.. فتح محادثات كمان مع روسيا وأوكرانيا.. وناس في السوق بتقول إن المحادثات دي ممكن توصل لمليون طن على مدى شهور.
طيب ليه التحرك ده دلوقتي؟
الإجابة في رقم واحد مخيف.. روسيا وأوكرانيا لوحدهم كانوا مغطيين أكتر من ٨٢٪ من واردات مصر من القمح في النص الأول من ٢٠٢٦.. يعني أكتر من أربع أخماس رغيفك جاي من منطقة واحدة.. ومنطقة مشتعلة.. الاضطرابات في البحر الأسود خربت الإمدادات.. والعقود الآجلة لقمح شيكاغو طلعت أكتر من ١٥٪ من بداية يوليو.
وعشان كده مصر بتنوع مصادرها.. عايزة إمداد أرخص وأأمن على المدى الطويل.. بدل ما تفضل رهينة سوق واحد لو اتقفل.. الكل يتأثر.
ومتحطش في دماغك إن في أزمة قريبة.. مصر اشترت السنة دي كمية قمح غير مسبوقة من المزارعين المحليين.. والاحتياطي بيغطي الطلب لشهور قدام.. التحرك ده تأمين للمستقبل.. مش هروب من أزمة.
فلو أسعار القمح العالمية فضلت طالعة.. تكلفة الاستيراد هتزيد.. وده في الآخر بينعكس على ميزانية الدعم.. اللي منها بيتصرف على رغيف العيش اللي بيوصل لعشرات الملايين.
