مصر تدخل سباق تصنيع الدواء عالميًا.. تحالف مصري أمريكي لإنتاج الأدوية والمكملات والتصدير للخارج

مصر بتدخل مرحلة جديدة في صناعة الدواء.. المرة دي بتحالف مع شركة أمريكية، والهدف مش بس تصنيع الأدوية والمكملات الغذائية داخل مصر، لكن كمان فتح أسواق عالمية قدام المنتجات المصرية.

القصة بدأت بشراكة بين الشركة القابضة للأدوية والكيماويات والمستلزمات الطبية «هولدي فارما» وشركة «Dawah Pharma» الأمريكية، لتأسيس كيان مشترك باسم «دوا هولدي».

الشركة الجديدة هتشتغل على تصنيع وتطوير وتسويق الأدوية والمكملات الغذائية والمستهلكات الطبية، مع الاستفادة من الخبرات الفنية واللوجستية للشريك الأمريكي.

والخطة مش هتقتصر على إنشاء منتجات جديدة، لكنها كمان هتشمل تحديث مصانع تابعة لهولدي فارما وتطوير خطوط الإنتاج، علشان تقدر تستوعب عمليات تصنيع أكبر وتقدم منتجات بمواصفات تنافسية.

والأهم إن التحالف حاطط التصدير ضمن أهدافه الرئيسية، من خلال فتح أسواق في أفريقيا وأوروبا وكندا والولايات المتحدة، مع تولي الشركة الأمريكية توزيع المنتجات في باقي دول الإقليم.

والتعاون هيمر بثلاث مراحل، تبدأ بتطوير مشروعات التصنيع، ثم طرح المنتجات، وبعدها التوسع في أسواق التصدير.

وبكده، الرهان مش بس على زيادة إنتاج الدواء داخل مصر، لكن كمان تحويل المصانع المصرية إلى قاعدة للتصنيع والتصدير، والاستفادة من الخبرات الأجنبية لفتح أسواق جديدة أمام الصناعة الدوائية المصرية.