سقوط مدوي للدولار في بنوك مصر.. 3 جنيه خسائر في 4 أيام
إيه اللي حصل للدولار وخلاه يخسر أكتر من 3 جنيهات في أيام قليلة؟ وهل رجوعه لمستوى 53 جنيه معناه إن موجة الارتفاعات القياسية انتهت؟ وإيه سر عودة الأموال الأجنبية للسوق المصري بقوة في الوقت اللي احتياطي النقد الأجنبي وتحويلات المصريين بالخارج بيسجلوا أرقام قياسية؟
الدولار في مصر دخل موجة تراجع جديدة.. بعد ما كان كسر مستوى 56 جنيه في بعض البنوك قبل أيام.. رجع النهارده وسجل مستويات قرب 53 جنيه.. في تحرك لافت بيكشف عن تغيرات مهمة في سوق الصرف.
ومن أبرز العوامل اللي بتدعم المشهد ده عودة تدفقات المستثمرين الأجانب والعرب لأدوات الدين الحكومية.. بعد موجة تخارج سجلت خلالها تعاملات الأجانب صافي بيع بنحو مليار ونص دولار الأسبوع الماضي.. لكن الصورة اتغيرت خلال آخر يومين.. مع تسجيل صافي مشتريات بقيمة 196.3 مليون دولار يوم الثلاثاء و110 ملايين دولار يوم الأربعاء.
وفي نفس الوقت.. احتياطي النقد الأجنبي المصري واصل الصعود لمستوى قياسي جديد عند 57.35 مليار دولار في سبتمبر.. مدعوما بتحسن مصادر العملة الصعبة زي الصادرات والسياحة وتحويلات المصريين وإيرادات قناة السويس.
واللافت كمان إن تحويلات المصريين بالخارج ارتفعت بنسبة 27.2% خلال أول 8 شهور من 2026.. وسجلت نحو 33.9 مليار دولار.. بينما وصلت خلال العام المالي الماضي إلى 47.3 مليار دولار.
لكن إيه تأثير الكلام ده على المواطن؟
تراجع الدولار ممكن يخفف ضغوط تكلفة الاستيراد على الشركات.. ويفتح المجال مع استمرار الانخفاض لتهدئة أسعار بعض السلع والمنتجات المستوردة.. لكن ده مش معناه إن الأسعار هتنخفض تلقائيا أو بنفس سرعة تراجع العملة.
سوق الصرف بيتلقى دعم من أكتر من مصدر للعملة الأجنبية.. لكن استمرار تراجع الدولار هيفضل مرتبط باستمرار التدفقات الدولارية وقدرة الاقتصاد على الحفاظ على موارده من النقد الأجنبي.
