30 سنة.. مصر تجهز لإسناد إدارة مطاراتها للقطاع الخاص
30 سنة.. دي المدة اللي مصر بتجهز لإسناد إدارة وتشغيل وتطوير مطاراتها للقطاع الخاص.
وزير الطيران المدني سامح الحفني أعلن إن الوزارة مستهدفة تمد فترة الإسناد من 25 سنة إلى حوالي 30 سنة، لكن ده لسه مرتبط باستكمال الإجراءات والموافقات، ومنها موافقة مجلس النواب.
طيب إيه اللي هيحصل بالضبط؟
الفكرة مش بيع المطارات، والحكومة أكدت إن ملكية أصول المطارات هتفضل للدولة وسيادتها عليها هتفضل كاملة، بينما القطاع الخاص هيدخل في الإدارة والتشغيل والتطوير والاستفادة من خبراته الفنية والإدارية.
والبداية هتكون من مطار الغردقة الدولي، باعتباره المشروع التجريبي للشراكة مع القطاع الخاص.
10 تحالفات تقدمت للمنافسة في مرحلة التأهيل المسبق، وبعد فحص العروض، تم تأهيل 7 تحالفات للانتقال للمرحلة التالية.
وبعد طرح كراسة الشروط وتقديم العروض، متوقع الإعلان عن التحالف الفائز خلال حوالي 6 لـ8 شهور من انتهاء مرحلة طرح كراسة الشروط.
والـ30 سنة مش معناها إن القطاع الخاص هياخد المطارات ويملكها، لكن الهدف إن يكون عنده فترة كافية يضخ خلالها استثمارات، وينفذ خطط التطوير، ويحقق عائد مناسب على استثماراته.
وكمان الوزارة أكدت إن دخول القطاع الخاص مش معناه الاستغناء عن العمالة الحالية، لكن الاتجاه هو إعادة تدريب وتأهيل العاملين ورفع كفاءتهم بما يتناسب مع التشغيل الحديث.
وفي نفس الوقت، مصر بتشتغل على رفع الطاقة الاستيعابية للمطارات المصرية لتقرب من 100 مليون راكب سنويًا، مع تطوير مطارات القاهرة وسفنكس والعلمين والعاصمة.
يعني مصر مش بتبيع مطاراتها.. لكنها بتجهز لنموذج جديد في إدارة وتشغيل وتطوير المطارات بالشراكة مع القطاع الخاص.
