وداعًا لفوضى الركنة؟.. شركة إماراتية تطور منظومة مواقف ذكية في مصر بالذكاء الاصطناعي

وداعًا لفوضى الركنة.. شكل مواقف العربيات في مصر ممكن يتغير قريب.. شركة "باركن" الإماراتية دخلت السوق المصري لأول مرة، ووقعت مذكرة تفاهم مع 3 شركات مصرية، بهدف بحث تطوير منظومة مواقف ذكية وحلول جديدة للتنقل.

الفكرة ببساطة إن الركنة تبقى معتمدة على التكنولوجيا بدل الزحمة والعشوائية.. قراءة آلية للوحات العربيات، وكاميرات مدعومة بالذكاء الاصطناعي، ومواقف من غير بوابات، وكمان تذاكر وتصاريح رقمية.

يعني ممكن في المستقبل تعرف مكان الركنة وتدخل وتخرج من غير ما تفضل تلف بالعربية تدور على مكان أو تتعامل مع إجراءات تقليدية.

والحلول دي كمان تستهدف تحسين إدارة المواقف ورفع كفاءة التشغيل، خصوصًا مع التوسع في المدن الجديدة والمجتمعات العمرانية.

لكن خد بالك.. لحد دلوقتي دي مذكرة تفاهم لاستكشاف فرص التعاون، يعني مفيش إعلان عن تنفيذ فعلي أو موعد محدد لتطبيق المنظومة في مصر. فهل فعلًا نشوف مواقف ذكية تنهي أزمة الركنة؟ ولا الموضوع لسه محتاج وقت؟