عملاء "حالا" يصرخون: تهديدات وملاحقة بأرقام الأقارب.. مين المسؤول عن تسريب البيانات؟
القسط اتأخر.. بس هل ده يدي أي حد الحق يضغط عليك بالطريقة دي؟!
شكاوى جديدة من عدد من المتعاملين مع شركة "حالا" للتمويل الاستهلاكي، بتتكلم عن ضغوط أثناء تحصيل الأقساط.
واحد من أصحاب الشكاوى قال إنه فوجئ بشخص بيكلمه وبيقول إنه تابع لشركة حالا، والأغرب إنه كان معاه بيانات شخصية عنه، من بينها صورته وصورة بطاقة الرقم القومي، وكمان رقم تليفون والدته
وبحسب روايته، الموضوع ما وقفش عند المطالبة بسداد القسط، لكنه اتطور لتهديده بالحضور إليه.
وهنا السؤال الأهم:
البيانات دي وصلت إزاي؟ وهل من حق جهات التحصيل التواصل مع أهل العميل أو استخدام أرقام أقاربه للضغط عليه؟
وكمان متضررون طالبوا برقابة أكبر على شركات التمويل والجهات المسؤولة عن التحصيل، وحماية بيانات العملاء من أي استخدام أو تداول غير قانوني.
إنت شايف إيه؟ تحصيل القسط له حدود.. ولا أي طريقة مسموحة لما العميل يتأخر؟ يعني لو عليك قسط متأخر، هل من حق شركة التمويل تكلم أهلك؟
