مفاجأة الجنيه الكبرى.. ضربة موجعة للدولار
إيه اللي حصل للدولار فجأة؟ وليه رجع ينزل تحت 50 جنيه في أغلب البنوك؟ وهل فعلا الأموال الساخنة رجعت تدخل مصر تاني؟ ولو المستثمرين الأجانب رجعوا يشتروا في أدوات الدين المصرية ده معناه إيه للجنيه المصري وللاقتصاد بشكل عام؟
اللي حصل النهارده إن الدولار سجل تراجع جديد في البنوك المصرية ووصل لمستويات أقل من 50 جنيه في أغلب البنوك وده بعد أيام قليلة من ارتفاع مؤقت حصل في السوق لكن المرة دي التراجع جه مع تطور مهم جدا وهو عودة الأموال الساخنة للدخول مرة تانية إلى أدوات الدين الحكومية المصرية ودي نقطة بتفسر جزء كبير من اللي بيحصل في سوق الصرف.
ولو بصينا على الأسعار هنلاقي إن أعلى سعر للدولار كان في المصرف العربي والبنك الأهلي الكويتي عند 49.80 جنيه للشراء و49.90 جنيه للبيع وده معناه إن حتى أعلى سعر في السوق نزل تحت مستوى 50 جنيه ودي رسالة إن المعروض من الدولار بدأ يزيد وإن الضغوط اللي ظهرت قبل كده بدأت تهدأ.
طيب إيه اللي حصل المرة دي؟
البيانات بتقول إن تعاملات العرب والأجانب في السوق الثانوية للدين الحكومي المصري سجلت صافي شراء بقيمة 282 مليون دولار خلال تعاملات أمس الأربعاء وده معناه إن المستثمرين الأجانب رجعوا يشتروا في أدوات الدين المصرية بعد موجة بيع حصلت قبلها بأيام
ولو نفتكر اللي حصل في بداية الأسبوع هنلاقي إن يوم الاثنين سجلت السوق صافي بيع بحوالي 331 مليون دولار بعد تخارجات محدودة يوم الأحد بحوالي 3.7 مليون دولار وده وقتها عمل ضغوط على الجنيه وخلى الدولار يرتفع بشكل مؤقت لكن مع عودة الشراء مرة تانية رجع الدولار ينزل واستعاد الجنيه جزء من قوته
طب هل معنى كده إن خروج الأموال الساخنة كان خطر كبير؟
أي خروج مفاجئ لاستثمارات المحافظ بيضغط على سوق الصرف لأنه بيزود الطلب على الدولار لكن في نفس الوقت رجوع التدفقات بسرعة بيدي رسالة إن المستثمرين لسه شايفين إن السوق المصرية جاذبة وإن أسعار الفائدة الحقيقية والعائد على أدوات الدين ما زالوا عامل جذب مهم
طيب هل اعتماد الاقتصاد على الأموال الساخنة حاجة كويسة ولا لأ؟
الحقيقة إن ليها مميزات وليها مخاطر في نفس الوقت لأنها بتوفر سيولة دولارية بسرعة وبتساعد في دعم الاحتياطي النقدي واستقرار سوق الصرف لكن لأنها استثمارات قصيرة الأجل فهي ممكن تتحرك بسرعة مع أي تغير في الأوضاع العالمية أو الإقليمية وعلشان كده أي اقتصاد بيحاول يعتمد أكتر على الاستثمارات المباشرة اللي بتدخل مصانع ومشروعات وتفضل موجودة لفترات طويلة.
