الدولار رايح على فين الأيام الجاية.. هنقولك سيناريوهات المواجهة الكبرى مع الجنيه

يا ترى الدولار رايح على فين الفترة الجاية؟وهل الجنيه هيكمل صعود زي ما حصل الأيام اللي فاتت؟ ولا هنشوف ارتفاع جديد في سعر الدولار ؟ وهل موافقة صندوق النقد على صرف شريحة جديدة من قرض الصندوق معناها إن الأزمة انتهت ولا لسه قدامنا تحديات جديدة؟ وإيه الأسباب اللي ممكن تخلي الدولار يتحرك تاني خلال الشهور الجاية؟… كل الأسئلة دي هنجاوب عليها بالأرقام وبآخر التطورات الاقتصادية.

سعر الدولار مش بيتحدد بقرار واحد ولا بتوقع شخص لكنه بيتحدد بمجموعة عوامل اقتصادية بتحصل في نفس الوقت واللي بيحصل دلوقتي إن الاقتصاد المصري أخد دفعة جديدة بعد موافقة صندوق النقد الدولي على آخر مراجعة للبرنامج ودي خطوة اتفسرت على إنها رسالة ثقة في قدرة الاقتصاد إنه يحافظ على مسار التعافي رغم كل الضغوط اللي حصلت خلال الفترة الأخيرة.

لكن هل معنى كده إن الأزمة انتهت والإصلاح الاقتصادي خلص؟

رسالة الصندوق كانت واضحة الاقتصاد قدر يحقق تقدم لكنه لسه قدامه طريق طويل ولسه فيه تحديات كبيرة محتاجة شغل أكتر لأن النجاح الحقيقي مش مجرد موافقة من صندوق النقد لكن النجاح الحقيقي هو إن الاقتصاد يفضل قوي حتى من غير أي دعم خارجي.

طيب إيه اللي خلى الصندوق يوافق على المراجعة الأخيرة؟

في أكتر من مؤشر إيجابي ظهر خلال الفترة الماضية الاقتصاد حقق معدل نمو وصل إلى 5.2 في أول 9 شهور من السنة المالية وكمان التضخم استقر بشكل نسبي والاحتياطي النقدي الأجنبي وصل لأعلى مستوياته التاريخية بالإضافة إلى إن الحكومة قدرت تحقق إيرادات ضريبية أعلى من المستهدف وحققت فائض أولي رغم أزمة الطاقة والتوترات اللي بتحصل في المنطقة.

لكن في نفس الوقت لسه فيه ملفات مفتوحة ومحدش يقدر يتجاهلها لأن الدين العام ما زال مرتفع واحتياجات التمويل مستمرة وبرنامج تخارج الدولة من بعض الأنشطة الاقتصادية بيتحرك ببطء والقطاع الخاص لسه مساهمته أقل من المطلوب مقارنة بحجم الاقتصاد وعلشان كده المراجعة الجاية من صندوق النقد متوقع تكون أصعب لأنها هتركز على التنفيذ الحقيقي مش على الوعود.

وده يقودنا لسؤال مهم جدا هل سعر الدولار هيطلع ولا هينزل خلال الفترة الجاية؟

التوقعات الحالية بتقول إن الدولار هيتحرك خلال النص الثاني من العام في نطاق بين 49 و53 جنيه وإن السعر الأقرب للتداول هيكون حوالي 51 إلى 52 جنيه وده معناه إن السوق متوقع استقرار نسبي مع وجود مساحة لحركة صعود وهبوط حسب الظروف الاقتصادية.

طيب ليه الجنيه لسه قادر يصمد رغم كل الضغوط؟

لأن فيه مصادر مهمة بتدعم العملة المصرية أولها تحويلات المصريين العاملين بالخارج اللي بقت مصدر قوي للعملة الأجنبية وكمان إيرادات السياحة اللي بتحقق تحسن مستمر وإيرادات قناة السويس اللي بدأت تتحسن تدريجيا مع تحسن حركة الملاحة بالإضافة إلى التمويلات الدولية وارتفاع أسعار الفائدة الحقيقية اللي بيشجع المستثمرين يدخلوا أدوات الدين المصرية.