5 جنيه من طلاب المدارس و10 جنيه على طن الاسمنت.. مقترح جديد لدعم أصحاب المعاشات

هو انت ممكن تدفع 5 جنيه زيادة على مصاريف المدرسة أو على كارتة الطريق علشان تساهم في زيادة المعاشات؟ سؤال أثار جدل كبير بعد طرح مجموعة أفكار جديدة لتمويل صندوق المعاشات في مصر

الاعلامي محمد على خير اقترح فرض رسوم بسيطة على بعض الخدمات والمعاملات اليومية، زي كارتات الطرق، وتجديد رخص القيادة، وحتى الطلاب في المدارس، على أن تروح حصيلة الرسوم دي مباشرة لدعم أصحاب المعاشات

الفكرة قائمة على مبدأ التكافل الاجتماعي، باعتبار إن أصحاب المعاشات قضوا سنوات طويلة في العمل، وبيحتاجوا لموارد مستدامة تضمن استمرار صرف مستحقاتهم وتحسين أوضاعهم المعيشية

ومن بين المقترحات المطروحة 2 جنيه على كارتة الطريق، و10 جنيه على طن الأسمنت، و5 جنيه على طلاب المدارس، ورسوم أعلى على المدارس الدولية، بالإضافة لرسوم بسيطة عند تجديد الرخص.

الموضوع فتح باب نقاش واسع بين مؤيد شايف إن المبالغ بسيطة وممكن تساعد ملايين أصحاب المعاشات، ومعارض بيعتقد إن المواطنين بقوا بيتحملوا رسوم جديدة بشكل مستمر.

والسؤال هنا لو الرسوم دي هتساهم فعلًا في تحسين معاشات كبار السن، هل تؤيد الفكرة ولا ترفضها؟