زيادة المعاشات لـ4 آلاف جنيه.. مفاجأة سارة لملايين المصريين

تخيل تبقى شغال طول عمرك… وفي الآخر معاشك ميكملش احتياجات أسبوع!”.

الملف اللي شاغل ملايين المصريين رجع يتصدر التريند من جديد، بعد مطالبات برفع الحد الأدنى للمعاشات لـ4 آلاف جنيه، وكمان مقترح زيادة سنوية ممكن توصل لـ20%.

دلوقتي في مشروع قانون بيتناقش تحت قبة البرلمان، الهدف منه إنه يربط زيادة المعاشات بمعدل التضخم، يعني كل ما الأسعار تعلى المعاش يزيد معاها بدل ما أصحاب المعاشات يفضلوا واقفين مكانهم.

والكلام مش بس عن زيادة وخلاص ده كمان فيه مقترحات لمكافآت إضافية للي اشتغلوا أكتر من 35 سنة، وإمكانية إن بعض الناس تكمل شغل بعد سن الستين لو مدة التأمين مش كفاية عشان ياخدوا معاش كامل.

الأمين العام لنقابة أصحاب المعاشات قال إن أعلى معاش وقت التقاعد حاليًا ممكن مايوصلش حتى لـ5300 جنيه مهما كان مرتب الموظف قبل المعاش، ووصف الفرق إنه “نزول من الدور العاشر للأرض” .

وكمان تم فتح ملف استثمار أموال المعاشات، بعد انتقادات إن الفوائد اللي كانت بتتحقق على مدار سنين قليلة جدًا مقارنة بأسعار الفائدة الحقيقية في السوق.

بس لحد دلوقتي كل ده مازال “مشروع قانون” ولسه قيد الدراسة، يعني مفيش قرارات نهائية اتطبقت رسميًا حتى الآن
بس هل فعلًا زيادة المعاشات لـ4 آلاف جنيه ممكن تخفف الضغط عن الناس؟