مصر على موعد مع أكبر مصنع لصويا صوص عالميا.. فوشان هايتيان تطلق مشروعها الصناعي
هل مصنع فوشان هايتيان هيخلي مصر مركز إقليمي لصناعة الصوص والتتبيلات؟، وهل التصنيع المحلي هيقلل فعلاً أسعار المنتجات دي في السوق المصري؟، وكام فرصة عمل ممكن يوفرها المجمع الصناعي ده للشباب؟، وهل نقل التكنولوجيا الصينية هيطوّر صناعة الأغذية في مصر؟، هل مصر قادرة تنافس عالميًا في منتجات كانت مستوردة بالكامل؟
مصر على موعد مع مشروع صناعي تقيل جدًا، مشروع ممكن يغير خريطة صناعة الصلصات والتتبيلات في المنطقة كلها.. الحكاية بدأت لما الهيئة القومية لسلامة الغذاء برئاسة الدكتور طارق الهوبي استقبلت وفد من شركة فوشان هايتيان، واحدة من أكبر الشركات العالمية في صناعة صوص الصويا والصلصات والمنتجات الغذائية.
الوفد جاي مصر مش زيارة وخلاص، ده جاي يدرس إنشاء مجمع صناعي متكامل على أرض مصر، لإنتاج منتجاته محليًا بدل ما تتشحن من بره، يعني إحنا مش بنتكلم عن خط إنتاج صغير، إحنا بنتكلم عن أكبر مصنع لصوص الصويا في المنطقة ممكن يطلع من مصر.
النوع ده من الاستثمارات مش استثمار عادي، ده استثمار استراتيجي بيدعم الأمن الغذائي المصري، ليه بقى؟.. لأنه بيعتمد على تعميق التصنيع المحلي، وتقليل الاستيراد، ونقل خبرات وتكنولوجيا عالمية للسوق المصري، وفي نفس الوقت الالتزام بأعلى معايير سلامة الغذاء.
من ناحية الشركة، وفد فوشان هايتيان قالها صريحة: المصنع ده مش معمول بس علشان السوق المصري، لكن علشان مصر تبقى مركز إقليمي للتصدير لأفريقيا والشرق الأوسط، يعني منتجات صوص الصويا اللي كانت بتيجي من الصين، ممكن تطلع من مصر لدول كتير حواليها.
كمان اتكلموا عن حاجة مهمة جدًا، وهي التكامل مع سلاسل الإمداد المحلية، يعني مواد خام، وتعبئة ونقل وتخزين، وكل ده هيكون من السوق المصري، وده معناه تشغيل مصانع تانية جنب المصنع الأساسي، وفرص عمل مباشرة وغير مباشرة، وطبعًا، سلامة الغذاء كانت محور أساسي في النقاش.
الهيئة كمان شددت أن أي منتج هيتصنع في مصر لازم يلتزم بالمعايير المصرية والدولية، علشان صحة المستهلك، وكمان علشان المنتج المصري يقدر ينافس بره بثقة، وفي نهاية اللقاء، الطرفين اتفقوا يكملوا الدراسات الفنية والتنسيق خلال الفترة الجاية، تمهيدًا للبدء الفعلي في التنفيذ، وده بيعكس مش بس قوة العلاقات الاقتصادية بين مصر والصين، لكن كمان أن مصر بقت وجهة جذابة للاستثمارات النوعية، مش أي استثمار وخلاص.
طيب مين هي فوشان هايتيان؟، دي شركة صينية عملاقة، اتأسست من أكتر من 100 سنة، ومقرها مدينة فوشان والنهارده هي رقم واحد في صوص الصويا داخل الصين، ومن أكبر الأسماء عالميًا في مجال النكهات والتخمير الغذائي، وبتنتج كل حاجة تقريبًا، صوص الصويا بأنواعه، وصوص المحار، والتتبيلات الجاهزة، ومعاجين فول الصويا، ومرق الطهي المركز، وخل الأرز وشبكة توزيعها واصلة لآسيا وأوروبا وأمريكا.
والتوقيت مش جاي بالصدفة، صادرات الصناعات الغذائية المصرية حققت قفزة واضحة في 2025، ووصلت لحوالي 6.8 مليار دولار، بزيادة عن السنة اللي قبلها، الدول العربية لسه أكبر سوق، لكن الاتحاد الأوروبي وأمريكا بيزيدوا بسرعة، وده معناه أن المنتج الغذائي المصري بقى موثوق عالميًا.
