وظايف برواتب توصل لـ15 ألف جنيه شهريًا.. تأمينات وسكن ومواصلات للشباب

لو بتدور على شغل بمرتب كويس ومميزات حقيقية.. الخبر ده ليك.. موقع فرصنا التابع لوزارة التضامن الاجتماعي، طرح مجموعة وظائف جديدة للشباب، برواتب بتوصل لـ 15 ألف جنيه شهريًا، مع تأمينات ومواصلات وسكن كمان في بعض الوظايف.

نبدأ بأول وظيفة.. سلامة وصحة مهنية في الشرقية.. مطلوب خبرة من 3 لـ10 سنين، السن من 25 لـ40 سنة، مؤهل ثانوي فني، والكمبيوتر جيد. المرتب من 7 لـ15 ألف جنيه شهريًا.

والمميزات؟ عندك بدل تغذية، وقت إضافي محسوب، سكن تابع للشركة، مواصلات على حساب الشركة، وتأمينات صحية واجتماعية.

الوظيفة التانية: مدخل بيانات في الشرقية.. خبرة من سنة لـ4 سنين، السن من 22 لـ35 سنة، مؤهل عالي تجارة شعبة محاسبة، وكمبيوتر جيد جدًا.المرتب من 6500 لـ7000 جنيه. وفيه وقت إضافي محسوب، سكن، مواصلات، وتأمينات كاملة.

الوظيفة التالتة: مندوب مبيعات خارجية في القاهرة، خبرة من 4 لـ10 سنين، السن من 25 لـ40 سنة، مؤهل دبلوم 5 سنين، والمرتب الأساسي من 6000 لـ10000 جنيه، وفي حوافز إضافية من 1000 لـ10000 جنيه كمان.. وكمان فيه مواصلات وتأمينات صحية واجتماعية.. الوظايف مناسبة لمؤهلات مختلفة، والمميزات واضحة، والأهم إنها من خلال موقع رسمي تابع لوزارة التضامن.