بعد طرحه رسميًا.. مين يستحق سند المواطن؟ والشروط كاملة

وزارة المالية بدأت رسميًا طرح سند المواطن من خلال فروع الهيئة القومية للبريد في كل المحافظات.. السند ده أداة ادخارية حكومية بتديك عائد سنوي ثابت 17.75% لمدة 18 شهر.. والعائد بيتصرف شهريًا يوم 15 من كل شهر.

طيب التفاصيل بسرعة:
القيمة الاسمية للسند 1000 جنيه.
لكن أقل مبلغ تقدر تشتري بيه هو 10,000 جنيه.
مدة الاستثمار سنة ونص.
والعائد ثابت طول المدة.

الميزة هنا إن السند مدعوم من وزارة المالية، وده بيخليه من الأدوات الآمنة مقارنة بأي استثمار فيه مخاطرة أعلى.
طيب مين الفئات اللي يناسبها سند المواطن؟
أصحاب المرتبات اللي عايزين دخل شهري إضافي ثابت.
اللي بيدوروا على استثمار متوسط المدة من غير مخاطرة.
اللي مش حابب يدخل في بورصة أو دهب أو أدوات متقلبة.
الناس اللي مش بتتعامل مع البنوك بشكل منتظم وعايزة بديل بسيط.

وطريقة الشراء سهلة جدًا:
تروح أقرب مكتب بريد
بطاقتك سارية
تحدد المبلغ بحد أدنى 10 آلاف جنيه
وتستكمل إجراءات الاكتتاب.

السند كمان ليه ضوابط للاسترداد لو حبيت تسحب قبل نهاية المدة حسب القواعد المنظمة.. اقتصاديًا، الفكرة مش بس استثمار شخصي.. ده كمان وسيلة بتسحب سيولة من السوق وتدخلها في أدوات دين حكومية، وده بيدعم استقرار المالية العامة ويزود مشاركة المواطنين في تمويل الموازنة بشكل مباشر.

السؤال المهم بقى: هل هو أفضل من شهادات البنوك؟ الإجابة بتعتمد على هدفك.. لكن اللي بيميز سند المواطن هو وضوح العائد، انتظام الصرف الشهري، والضمان الحكومي، مع إجراءات بسيطة من غير تعقيد.. لو معاك مبلغ وعايز دخل ثابت لمدة 18 شهر.. سند المواطن ممكن يكون اختيار مناسب ليك.